काठमाडौं। नेपाल प्रिमियर लिग (एनपीएल) मा काठमान्डु गोर्खाजले विराटनगरलाई ९ विकेटले पराजित गर्दै प्रतियोगितामा आफ्नो दोस्रो जित दर्ता गरेको छ। कीर्तिपुरस्थित टियु क्रिकेट मैदानमा विराटनगरले दिएको ८४ रनको सामान्य लक्ष्य काठमान्डुले ९.४ ओभरमा १ विकेट गुमाएर पूरा गर्यो। काठमान्डुको जितमा अस्ट्रेलियन ब्याटर डेभिड वार्नर ४४ र विलियम बोसिस्टो २३ रनमा अविजित रहे। टोलीले ६.२ ओभरमै ५० रनको स्कोर पार गरेको थियो। यसअघि टस हारेर ब्याटिङको निम्तो पाएको विराटनगर १८.३ ओभरमा ८३ रनमै समेटिएको थियो। विराटनगरको ब्याटिङ लाइनअप निकै कमजोर देखियो, जसमा रूपेश सिंहले सर्वाधिक २६ र एन्जेलो म्याथ्युजले २२ रन बनाए। टोलीका तीन ब्याटरले खाता खोल्न सकेनन् भने आन्द्रे रसेल ३ रनमा आउट भए। लोकेश बम ६ रन र बसिर अहमद १० रनमा सीमित रहे। काठमान्डुको बलिङमा सन्तोष यादवले तीन र सहन आरच्चिगेले दुई विकेट लिए। यसैगरी करण केसी, जहानदाद खान, शाहब आलम र देव शाहले एक-एक विकेट हात पारे। पाँच खेल खेलेको विराटनगरको यो तेस्रो हार हो। यता, तीन खेल खेलेको काठमान्डुले दुई जित र एक हारको नतिजा निकालेको छ।
एनपीएल : काठमान्डु गोर्खाजको सहज जित, विराटनगर ९ विकेटले पराजित
Read Complete Original Article
Published originally on नेपालन्युज
