एनपीएलमा राहुलको सनसनी

काठमाडौं । नेपाल प्रिमियर लिग (एनपीएल) को तेस्रो संस्करणमा जनकपुर बोल्ट्सबाट खेलिरहेका १७ वर्षीय बलर राहुल यादवले सनसनीपूर्ण प्रदर्शन गरेका छन् । यादवले सुरुआती दुई खेलमै प्रभावशाली प्रदर्शन गर्दै क्रिकेटप्रेमीको ध्यान खिचेका हुन् । दायाँहाते मध्यम गतिका बलर यादवले दुई खेलमा कुल ६ विकेट लिएपछि उनी एनपीएलका नयाँ सनसनीका रूपमा देखिएका छन् । यादवले पहिलो खेलमै आफ्नो बलिङ क्षमता प्रमाणित गरेका थिए । उनले चार ओभरमा १५ रन मात्रै खर्चेर दुई विकेट लिएका थिए । उक्त खेलमा उनले हुसेन तलात र दीपक डुम्रेलाई आउट गर्दै जनकपुर बोल्ट्सका लागि महत्वपूर्ण योगदान दिएका थिए । कम रन खर्चेर दुई महत्वपूर्ण विकेट लिन सफल भएपछि उनको प्रदर्शन चर्चामा आएको थियो । दोस्रो खेलमा भने यादवले अझ उत्कृष्ट बलिङ गरे । उनले चार ओभरमा ३१ रन खर्चेर चार विकेट लिए । यस क्रममा उनले स्मित पटेल, साम हेजलेट, करण केसी र आदिल आलमलाई पवेलियन फर्काएका थिए । एकै खेलमा चार विकेट लिएपछि यादवले आफ्नो बलिङ क्षमता र दबाबमा प्रदर्शन गर्न सक्ने खुबी देखाएका छन् । एनपीएलमा केवल दुई खेल खेलेका यादवले अहिलेसम्म ६ विकेट लिइसकेका छन् । १७ वर्षको उमेरमै अनुभवी ब्याटरहरूविरुद्ध प्रभावशाली बलिङ गरेका उनले प्रतियोगितामा आफ्नो सम्भावना देखाएका छन् । यही प्रदर्शनलाई निरन्तरता दिन सके यादव जनकपुर बोल्ट्सका महत्वपूर्ण बलर बन्नुका साथै नेपाली क्रिकेटमा उदाउँदो प्रतिभाका रूपमा स्थापित हुन सक्ने विश्लेषण हुन शुरु भएको छ । The post एनपीएलमा राहुलको सनसनी appeared first on Corporate Khabar : Nepals First Corporate News Magazine and Portal.