एनपीएलबाट क्यानले ७५ करोडसम्मको कारोबार गर्ने अनुमान

काठमाडौं । नेपाल प्रिमियर लिग (एनपीएल) को तेस्रो संस्करणबाट नेपाल क्रिकेट संघ (क्यान) ले ७० देखि ७५ करोड रुपैयाँसम्मको आर्थिक कारोबार गर्ने अनुमान गरेको छ। क्यानका कोषाध्यक्ष पदम खड्काले आइतबार कीर्तिपुरस्थित क्रिकेट मैदानमा आयोजित पत्रकार सम्मेलनमा प्रतियोगिताको प्रायोजन, टिकट बिक्रीलगायतका स्रोतबाट उक्त परिमाणमा कारोबार हुने अनुमान गरिएको जानकारी दिनुभएको हो। उहाँका अनुसार एनपीएलको तेस्रो संस्करणमा प्रायोजनबाट मात्रै करिब २० करोड रुपैयाँ प्राप्त हुने अपेक्षा गरिएको छ। टिकट बिक्री तथा अन्य स्रोतबाट हुने आम्दानीसमेत जोड्दा क्यानअन्तर्गत प्रतियोगिताको आर्थिक कारोबार ७० देखि ७५ करोड रुपैयाँसम्म पुग्ने अनुमान गरिएको उहाँले बताउनुभयो। फ्रेन्चाइज टोलीका मालिकहरूले पनि क्यानले प्रतियोगिताका लागि गर्ने खर्चकै हाराहारीमा खर्च गर्ने अनुमान रहेको खड्काले जानकारी दिनुभयो। यसअनुसार प्रतियोगिताको एक महिनाको अवधिमा समग्र आर्थिक कारोबार करिब डेढ अर्ब रुपैयाँ पुग्ने उहाँको अनुमान छ। खड्काले एनपीएलको तेस्रो संस्करणका लागि पुरस्कार राशि पनि बढाइएको जानकारी दिनुभयो। प्रतियोगिताको विजेताले एक करोड ५० लाख रुपैयाँ प्राप्त गर्नेछ भने उपविजेताले ८० लाख रुपैयाँ पाउनेछ। त्यसैगरी, तेस्रो हुने टोलीले ४० लाख र चौथो हुने टोलीले ३० लाख रुपैयाँ प्राप्त गर्नेछ। पहिलो र दोस्रो संस्करणमा पनि व्यक्तिगत तथा टोलीगत पुरस्कारको व्यवस्था गरिएको उल्लेख गर्दै उहाँले यसपटक एनपीएल गभर्निङ काउन्सिलको सल्लाह र क्यान अध्यक्षको सहमतिमा पुरस्कार राशि निर्धारण गरिएको बताउनुभयो। क्यानको नेतृत्वले नेपाली क्रिकेटलाई आर्थिक रूपमा सबल बनाउने र संस्थाको कार्यकाललाई उपलब्धिमूलक बनाउने लक्ष्यसहित काम गरिरहेको उहाँको भनाइ छ। एनपीएलको पहिलो संस्करणदेखि तेस्रो संस्करणसम्म आइपुग्दा प्रतियोगिताले आर्थिक रूपमा उल्लेखनीय प्रगति गरेको पनि उहाँले बताउनुभयो। एनपीएलको तेस्रो संस्करणले नेपाली क्रिकेटको व्यावसायिक विकासमा थप योगदान पुर्‍याउने अपेक्षा क्यानले गरेको छ।