एनपिएल : विराटनगरविरुद्ध काठमाडौंको सहज जित

काठमाडौं । काठमाण्डू गोर्खाजले नेपाल प्रिमियर लिग (एनपिएल) को तेस्रो सिजनमा दोस्रो जित निकालेको छ । योसँगै टोली प्रतियोगिताको दोस्रो स्थानमा उक्लिएको छ । टोलीले तीन खेल खेल्दा दुई जित र एक हार व्यहोरेको छ । काठमाण्डूले समान चार अंक बनाएको कर्णाली याक्सलाई रन रेटका आधारमा पछाडि पारेको हो । काठमान्डु गोर्खाजका बलरहरूले सानदार बलिङ गरेपछि बिहीबारको दोस्रो खेलमा विराटनगर किंग्स १९.३ ओभरमा ८३ रनमा अलआउट भएको छ । कीर्तिपुरस्थित टीयू मैदानमा टस हारेर पहिले ब्याटिङ गरेको विराटनगरले सुरुवातदेखि निरन्तर विकेट गुमाउँदा कम स्कोरमा समेटिएको हो । विराटनगरका लागि नवौँ नम्बरमा ब्याटिङ रगेका रुपेश सिंहले २७ बल खेल्दै तीन चौका र एक छक्का मद्दतमा सर्वाधिक २६ रन बनाउनुभयो । रुपेशसँगै एन्जेलो म्याथ्युज र बसिर अहमदले मात्र विराटनगरका लागि दोहोरो अंकमा रन बनाउन सक्नुभयो । म्याथ्युजले ३१ बल खेलेर २२ रन जोड्दा बसिर अहमदले १० रन बनाउनुभयो । शेहान जायसूर्या पाँच, लोकेश बम छ, आन्द्रे रसेल तीन र अपराजित पौडेल दुई रनमा आउट हुँदा इमरान शेख, नारायण जोशी र शुभम रन्जानेले खातासमेत खोल्न सक्नुभएन । कप्तान सन्दीप लामिछाने तीन रनमा अविजित रहनुभयो । विराटनगरका लागि पहिलो विकेटका शेहान जयासूर्या र लोकेश बमले ११ रनको साझेदारी गर्नुभएको थियो । त्यसपछि साझेदारी गर्न संघर्ष गरेको विराटनगरले ३५ रनमै सात विकेट गुमाएको थियो । एन्जेलो र रुपेशले आठौं विकेटका लागि ४० बलमा ३९ रनको साझेदारी गर्दै इनिङ्स सम्हाल्नुभएको हो । आठौं विकेटका लागि एन्जेलो म्याथ्युज र रुपेश सिंहले गरेको साझेदारी नै सर्वाधिक रनको साझेदारी गर्नुभयो । काठमान्डुका लागि युवा बलर सन्तोष यादवले तीन ओभरमा ११ रन खर्चेर सर्वाधिक तीन विकेट लिनुभयो । सहान अराचिगेले दुई ओभरमा सात रन खर्चेर दुई विकेट लिनुभयो । जहानदान खानले ३.३ ओभरमा १९ रन खर्चेर दुई विकेट लिनुभयो । कप्तान करण केसी, शाहब आलम र देव शाहले एक–एक विकेट लिनुभयो । एनपिएलमा विराटनगरको यो दोस्रो कम स्कोर हो । यसअघि सन् २०२५ मा भएको एनपिएलको दोस्रो संस्करणको क्वालिफायर वानमा विराटनगर सुदूरपश्चिम रोयल्ससँग ७८ रनमा अलआउट भएको थियो । लुम्बिनीको अपराजित यात्रा कायमैयसअघि बिहीबार सम्पन्न पहिलो खेलमा लुम्बिनी लायन्सले जनकपुर बोल्ट्सलाई १६ रनले हराएको छ । कीर्तिपुरस्थित अन्तर्राष्ट्रिय क्रिकेट मैदानमा टस हारी पहिले ब्याटिङको निम्तो पाएको लुम्बिनी लायन्सले निर्धारित ओभरमा आठ विकेट गुमाएर १४९ रन बनाएको थियो । मध्यम लक्ष्य पछ्याउँदै जवाफी ब्याटिङमा ओर्लिएको जनकपुर बोल्ट्सले भने निर्धारित ओभरमा आठ विकेट गुमाएर १३३ रनमात्र बनाउन सक्यो ।जितसँगै लुम्बिनीले आफ्नो अपराजित यात्रा चार पुर्‍याएको छ । एनपिएलको जारी संस्करणमा एक खेल पनि नहार्ने लुम्बिनी एकमात्र टोली हो । लुम्बिनी सात अंकसहित तालिकाको पहिलो स्थानमा छ । आफ्नो पाँचौँ खेल खेलेको जनकपुरको भने यो तेस्रो हार हो । केवल दुई खेलमा जित हात पारेको जनकपुरले चार अंक जोडेको छ । जनकपुरका ब्याट्सम्यानहरूले गतिलो प्रदर्शन गर्न सकेनन् । जनकपुरका चारजना ब्याटरले मात्र दोहोरो अंकमा रन बनाउन सके । सेफ हसनले २८ रन बनाउनुभयो । उहाँले २५ बलमा चार चौका हिर्काउनुभयो । ओपनर तृतराज दास पनि १८ बलमा एक चौकाको मद्दतले १८ रन बनाउँदै आउट हुनुभयो । आठौँ नम्बरमा क्रिज समाल्न आएका कप्तान हरमित सिंहले आक्रामक पाली खेल्दै २० बलमा तीन छक्काको मद्दतले ३३ रन बनाउनुभयो । नवौँ नम्बरका ब्याटर आदित्य महताले आक्रामक ब्याटिङ गर्दै अविजित ३० रन जोडनुभयो । उहाँले केवल २४ बलमा चार छक्का प्रहार गर्नुभयो । जनकपुरलाई लक्ष्यसम्म पुग्न नदिन लुम्बिनीका बलरहरूले अब्बल प्रदर्शन गरे । डार्शी सर्टले तीन विकेट लिनुभयो । तिलक भण्डारी र शेर मल्लले दुई–दुई विकेट हात पार्नुभयो । रुवेन ट्रम्पलम्यानले एक विकेट लिनुभयो । त्यसअघि, लुम्बिनीले पहिलो ओभरको पहिलो बलमै ओपनर डार्शी सर्टलाई गुमाएको थियो । सर्टलाई जनकपुरका बलर ललित राजवंशीले राहुल यादवद्वारा क्याच गराउनुभएको थियो । त्यसपछि, सम्हालिएको लुम्बिनीका लागि अर्का ओपनर आसिफ शेख र निरोशन डिकवेलाले ४३ रनको साझेदारी गर्नुभएको थियो । तेस्रो नम्बरमा क्रिज समाल्न आउनुभएका विकेटकिपर ब्याट्सम्यान डिकवेलाले २७ बलमा एक छक्का र दुई चौकाको मद्दतले २७ र आसिफ शेखले २१ बलमा एक छक्का र दुई चौकाको मद्दतले २१ रन बनाउनुभयो । कप्तान रोहित पौडेलले पनि टोलीको खातामा महत्त्वपूर्ण ३८ रन थप्नुभयो । चौथो नम्बरमा क्रिज समाल्न आउनुभएका रोहितले ३१ बलमा एक छक्का र चार चौका हिर्काउनुभयो । दिलिप नाथले १५ बलमा दुई छक्का र एक चौकाको मद्दतले २१ रन जोडनुभयो । छैटौँ नम्बरका ब्याट्र समिम होसैनले १३ बलमा एक छक्काको मद्दतले १३ रन बनाउनुभयो । सन्दीप जोरा पनि चार बलमा दुई चौकाको मद्दतले नौ रन बनाउँदै आउट हुनुभयो । रुवेन ट्रम्पलम्यानले आठ बलमा दुई छक्काको मद्दतले १५ रन बटुल्नुभयो । जनकपुर बोल्ट्सका बलर विशाल सुस्लिङ र राहुल यादवले दुई–दुई विकेट लिनुभयो । ललित राजवंशी, हरमित सिंह र अभिषेख तिवारीले पनि एक-एक विकेट हात पार्नुभयो ।