काठमाडौं।गैरआवासीय नेपाली संघ (एनआरएनए) का पाँच पूर्व अध्यक्षसहितको प्रतिनिधिमण्डलले सभामुख डोलप्रसाद (डीपी) अर्यालसँग भेट गरी आगामी मध्यपूर्व क्षेत्रीय सम्मेलनमा प्रमुख आतिथ्यका लागि निमन्त्रणा गरेको छ। प्रतिनिधिमण्डलले बिहीबार सभामुख अर्याललाई कतारको दोहामा आगामी डिसेम्बर ११ र १२ मा आयोजना हुने नवौं एनआरएनए मध्यपूर्व क्षेत्रीय सम्मेलन–२०२६ को निमन्त्रणा हस्तान्तरण गरेको हो। भेटमा गैरआवासीय नेपाली नागरिकताको प्रभावकारी कार्यान्वयन, गैरआवासीय नेपाली ऐन, नेपालमा लगानी, विप्रेषण तथा वैदेशिक रोजगारीमा रहेका नेपाली श्रमिकका हकहितका विषयमा छलफल भएको थियो। प्रतिनिधिमण्डलले गैरआवासीय नेपाली ऐनलाई सदनमा प्रस्तुत गरी पारित गर्ने प्रक्रियामा सहजीकरण गर्न सभामुखसँग आग्रह गरेको थियो। साथै, विदेशमा रहेका नेपालीको ज्ञान, सीप, अनुभव र पुँजीलाई नेपालको विकाससँग जोड्नुपर्नेमा जोड दिएको थियो। सभामुख अर्यालले एनआरएनए सबै नेपालीको साझा संस्था भएकाले यसलाई एकताबद्ध र बलियो बनाउनुपर्ने बताए। संस्थाभित्र अनावश्यक राजनीतिक गतिविधि हुन नहुने उल्लेख गर्दै उनले स्थापनाकालीन उद्देश्यअनुसार अघि बढ्न सुझाव दिए। उनले सम्मेलनको निमन्त्रणाका लागि धन्यवाद दिँदै आफ्नो कार्यव्यस्तता विचार गरी सहभागिताबारे निर्णय गर्ने बताए।
एनआरएनए टोलीद्वारा सभामुखलाई सम्मेलनको निमन्त्रणा
Read Complete Original Article
Published originally on नेपालन्युज
