जनकपुरधाम । नेपालीको दोस्रो ठूलो पर्व तिहारलगत्तै सुरु भएको छठ पर्वको तयारीले मिथिला क्षेत्रका गाउँबस्ती र बजारमा चहलपहल बढेको छ । चार दिनसम्म मनाइने पर्वका लागि स्थानीयवासी छठघाट निर्माण, सरसफाइ, सजावट तथा पूजासामग्रीको जोहोमा जुटेका छन् । छठको आगमनसँगै मिथिलाका घरघरमा भक्तिगीत गुञ्जिन थालेका छन् । नदी, पोखरी तथा जलाशयका किनारमा छठघाट निर्माण र सरसफाइ भइरहेको छ भने घर तथा सार्वजनिक स्थलमा बत्ती र सजावटका सामग्री राख्ने क्रम बढेको छ । पर्वका लागि आवश्यक केराका घरी, उखु, अदुवा, बेसार, ज्यामिरलगायत पूजासामग्रीको बिक्री बढेको छ । बाँसबाट निर्मित ढकी, डलिया, कोनियाँ तथा माटाका दियो, गाग्री र अन्य भाँडाको मागसमेत बढेको स्थानीय व्यापारीले बताएका छन् । यस्तै, घरघरमा छठको प्रसादका रूपमा ठकुवा र भुसुवा बनाउने चटारो छ । शुद्धता र पवित्रतालाई विशेष महत्त्व दिइने पर्वमा चामल तथा गहुँको पिठो घरमै तयार गर्ने परम्परा अझै कायम छ । मिथिलामा कात्तिक शुक्ल चतुर्थीदेखि सप्तमीसम्म छठ मनाइन्छ । पहिलो दिन नहाय-खाय, दोस्रो दिन खरना, तेस्रो दिन अस्ताउँदो सूर्यलाई अर्घ्य र चौथो दिन उदाउँदो सूर्यलाई अर्घ्य अर्पण गरी पर्व सम्पन्न गरिन्छ । सामाजिक सद्भाव र एकताको प्रतीकका रूपमा समेत लिइने छठमा जातीय तथा सामुदायिक विभेद बिर्सेर सबै समुदायका मानिस एउटै छठघाटमा भेला भई सूर्यदेव र षष्ठीदेवीको पूजा गर्ने परम्परा छ ।
आजदेखि छठ पर्व सुरु, पहिलो दिन ‘नहाय-खाय’
Read Complete Original Article
Published originally on हिमालय टाइम्स
