अवैध लागूऔषधसहित विभिन्न जिल्लाबाट २३ जना पक्राउ

काठमाडौं । प्रहरीले देशका विभिन्न जिल्लामा सञ्चालन गरेको कारबाहीका क्रममा अवैध लागूऔषधसहित २३ जनालाई पक्राउ गरेको छ । काठमाडौं, सुनसरी, उदयपुर, झापा, सिराहा, कपिलवस्तु, कैलाली, बझाङ, धनुषा र मकवानपुरलगायतका स्थानबाट उनीहरू पक्राउ परेका हुन् । प्रहरीकाअनुसार पक्राउ परेकाहरूको साथबाट खैरो हेरोइन, ब्राउनसुगर, चरेस, गाँजा तथा ट्रामाडोल, स्पास्पेन, स्पास्मो र नाइट्राजेपामजस्ता लागूऔषध बरामद गरिएको छ । काठमाडौं महानगरपालिका-३२ नरेफाँटबाट खैरो हेरोइनजस्तो देखिने १ ग्राम ७६० मिलिग्राम पदार्थसहित चार जना पक्राउ परेका छन् । प्रहरी प्रभाग कोटेश्वरबाट खटिएको टोलीले उनीहरूलाई पक्राउ गरेको हो । प्रहरीले उनीहरूले प्रयोग गरेका दुईवटा ट्याक्सी र एउटा स्कुटरसमेत बरामद गरेको छ। सुनसरीको इनरुवा नगरपालिका-४ बसचोकबाट ब्राउनसुगरजस्तो देखिने ३ ग्राम ७५० मिलिग्राम पदार्थसहित तीन जना पक्राउ परेका छन् । त्यस्तै, इटहरी उपमहानगरपालिका-१३ बाट ट्रामाडोल ६ हजार ९८० ट्याब्लेट र स्पास्पेन ७ हजार ट्याब्लेटसहित दुई जना पक्राउ परेका छन् । प्रहरीले सिटी सफारी जाँच गर्ने क्रममा उक्त लागूऔषध फेला पारेको जनाएको छ। सुनसरीकै बराहक्षेत्र नगरपालिका-५ राँगाचोकबाट ब्राउनसुगरजस्तो देखिने ११० मिलिग्राम पदार्थ र २३ हजार १८५ रुपैयाँ नगदसहित एक जना पक्राउ परेका छन् । उदयपुरको चौदण्डीगढी नगरपालिका-६ बसपार्कबाट स्पास्मो २८८ ट्याब्लेट र नाइट्राजेपाम ३०० ट्याब्लेटसहित एक जना पक्राउ परेका छन्। झापाको बिर्तामोड नगरपालिका-५ नयाँ बसपार्कस्थित डेराबाट ब्राउनसुगरजस्तो देखिने ३ ग्राम १ मिलिग्राम पदार्थसहित अर्का एक जना पक्राउ परेको प्रहरीले जनाएको छ । सिराहाको गोलबजार नगरपालिका-४ निपनिया चोकबाट खैरो हेरोइनजस्तो देखिने ५३ ग्राम ३० मिलिग्राम पदार्थ र डिजिटल तराजुसहित दुई जना पक्राउ परेका छन् । लागूऔषध नियन्त्रण ब्युरो शाखा कार्यालय बर्दिवासबाट खटिएको टोलीले मोटरसाइकलमा सवार उनीहरूलाई पक्राउ गरेको हो । कपिलवस्तुको शिवराज नगरपालिका-२ हल्लानगरबाट ब्राउनसुगरजस्तो देखिने ९ ग्राम २४० मिलिग्राम पदार्थ र डिजिटल तराजुसहित एक महिला पक्राउ परेकी छन् । कैलालीको धनगढी उपमहानगरपालिका-७ भानुचोकबाट ब्राउनसुगरजस्तो देखिने ४ ग्राम ८१६ मिलिग्राम पदार्थसहित दुई जना पक्राउ परेका छन् । धनगढी-१२ कम्पनीटोलबाट पनि ४६४ मिलिग्राम उक्त पदार्थसहित दुई जना पक्राउ परेको प्रहरीले जनाएको छ। बझाङको बित्थडचिर गाउँपालिका-८ बागथला बजारबाट चरेसजस्तो देखिने ५ किलो १९५ ग्राम पदार्थसहित एक जना पक्राउ परेका छन् । चैनपुरबाट धनगढीतर्फ जाँदै गरेको बस जाँच गर्ने क्रममा उक्त पदार्थ फेला परेको प्रहरीले जनाएको छ । धनुषाको गणेशमान चारनाथ नगरपालिका-९ बरमझियाबाट गाँजा ३६० ग्रामसहित एक जना पक्राउ परेका छन् । मकवानपुरको हेटौंडा उपमहानगरपालिका-१ बाट खैरो हेरोइनजस्तो देखिने ३२० मिलिग्राम पदार्थसहित एक जना पक्राउ परेका छन् । प्रहरीले उनको मोटरसाइकलसमेत बरामद गरेको छ । प्रहरीकाअनुसार पक्राउ परेका सबै घटनामा आवश्यक अनुसन्धान भइरहेको छ।