जेनेभा । अमेरिका र रुसले मानवरहित स्वचालित हतियारलाई नियमन गर्ने नयाँ अन्तर्राष्ट्रिय प्रस्तावको विरोध गर्ने तयारी गरेका छन्। सोमबारबाट जेनेभामा सुरु भएको संयुक्त राष्ट्रसंघीय सम्मेलनले घातक स्वचालित हतियार प्रणालीलाई निषेध र नियमन गर्ने कानुनी सम्झौताका लागि वार्ता सुरु गर्ने विषयमा निर्णय गर्नेछ। संयुक्त राष्ट्रसंघ र रेडक्रसले स्वचालित हतियारको गम्भीर खतराबारे चेतावनी दिएपनि अमेरिका, रुस र इजरायललगायतका देशहरूले विद्यमान मानवीय कानुन नै पर्याप्त रहेको भन्दै नयाँ बाध्यकारी नियमको विरोध गरिरहेका छन्। यसैबीच, सम्भावित त्रुटि र अनपेक्षित खतराबाट बच्नका लागि कूटनीतिज्ञहरूले कानुनी र गैर-कानुनी प्रावधान मिसिएको (हाइब्रिड) सम्झौताको विकल्प पनि खोजिरहेका छन्। अमेरिकाले भने बाध्यकारी नियमको सट्टा गैर-कानुनी निर्देशिकाको पक्षमा ५ वर्षे म्यान्डेट प्रस्ताव गरेको छ। सम्मेलनको अन्त्यसम्ममा कुनै सम्झौतामा सहमति जुट्न सक्ने आशा गरिएको छ।ह्युमन राइट्स वाचजस्ता अधिकारवादी संस्थाहरूले मेसिनलाई मानिसको जीवन वा मृत्युको निर्णय गर्ने अधिकार दिन नहुने बताएका छन्। आर्टिफिसियल इन्टेलिजेन्स (एआई) को विकाससँगै ड्रोन, रोबोट, ट्याङ्क र पानीमुनिका साधनहरूले मानिसको प्रत्यक्ष संलग्नताबिना नै आक्रमण गर्न सक्ने अवस्था बनेको छ । यस्ता घातक हतियारहरू युक्रेन, सुडान र मध्यपूर्वमा समेत प्रयोग भइसकेका छन्। रोयटर्स
स्वचालित हतियार नियन्त्रण गर्ने नयाँ प्रस्तावको विरोधमा अमेरिका- रुस

Read Complete Original Article
Published originally on केन्द्रबिन्दु






