समस्याग्रस्त कर्णाली डेभलपमेन्ट बैंकका ३५ सेयरधनीको सेयर पूँजी १ प्रतिशतमा झारियो !

काठमाडौँ । समस्याग्रस्त कर्णाली डेभलपमेन्ट बैंकका ३५ जना सेयरधनीको सेयर पूँजी घटाएर १ प्रतिशतमा झारिएको छ । बैंकको सम्पत्ति तथा दायित्व मूल्यांकन गर्दा दायित्व नखाम्ने अवस्था देखिएको र अवैधानिक रुपमा पूँजी चुक्ता गरेको पाइएपछि राष्ट्र बैंकद्वारा गठित व्यवस्थापन समूहले ३५ जना सेयर धनीको सेयर पूँजी १ प्रतिशतमा झारेको हो । ‘नेपाल राष्ट्र बैंक ऐन, २०५८’ को दफा ८६ (ङ) को उपदफा (१) को खण्ड (च) र (ज) तथा दफा ८६ (ज) अनुसार सेयर स्वामित्व घटाएर १ प्रतिशतमा सीमित गरिएको व्यवस्थापन समूहले जनाएको छ । व्यवस्थापन समूहको सेयर पूँजी घटाउने निर्णय कम्पनी रजिष्ट्रार कार्यालयमा अभिलेखीकरण गर्नुपूर्व उच्च अदालत तुलसीपुर (नेपालगञ्ज इजलास)मा मंसिर ९ गते सुनुवाइ हुनेछ । सो निर्णयप्रति कसैको दाबी-विरोध भए प्रमाणसहित तोकिएको मिति र समयमा अदालतमा उपस्थित हुन व्यवस्थापन समूहले सार्वजनिक सूचनामार्फत आह्वान गरेको छ ।