मंसिरमा ‘गरिमा रोड रेस २०८३’

काठमाडौं । स्वास्थ्यका लागि खेलकुद भन्ने नाराका साथ गरिमा विकास बैंकले आफ्नो स्थापनाको २०औँ वार्षिकोत्सवमा गरिमा रोड रेसको तेस्रो संस्करण ‘गरिमा रोड रेस २०८३’ आयोजना गर्ने भएको छ । प्रतियोगिता आगामी मंसिर ५ गते काठमाडौंमा सञ्चालन हुने बताइएको छ । स्वस्थ जीवन शैली प्रवर्द्धन, खेलकुदप्रति जनचेतना अभिवृद्धि तथा धावकहरूको प्रतिभा प्रोत्साहन गर्ने उद्देश्यले विकास बैंकले २०८१ सालदेखि प्रतियोगिता सुरुवात गरेको हो । यस वर्षको प्रतियोगितामा खुला र कर्पोरेटतर्फ गरी करिब १५ सय धावकको सहभागिता रहने बैंकले अपेक्षा गरेको छ । बैंकका अनुसार प्रतियोगिता खुला तथा कर्पोरेट गरी दुई विधामा सञ्चालन हुनेछ । खुलातर्फ महिला तथा पुरुष दुवै समूहका लागि १० किलोमिटर र कर्पोरेटतर्फ महिला तथा पुरुष दुवै समूहका लागि पाँच किलोमिटर दूरी निर्धारण गरिएको छ । कर्पोरेट विधातर्फ नेपाल राष्ट्र बैंक, नेपाल धितोपत्र बोर्ड, नेपाल स्टक एक्सचेन्ज, बैंक तथा वित्तीय संस्था, मर्चेन्ट बैंक, बीमा कम्पनी, पेमेन्ट सर्भिस प्रोभाइडर र पेमेन्ट सिस्टम अपरेटर्समा कार्यरत स्थायी कर्मचारीमात्र सहभागिताका लागि योग्य हुनेछन् । प्रतियोगितामा उत्कृष्ट प्रदर्शन गर्ने धावकलाई आकर्षक नगद पुरस्कारका साथै दौड पूरा गर्ने धावकलाई सर्टिफिकेट र मेडलसमेत व्यवस्था गरिएको छ । खुलातर्फ महिला तथा पुरुष दुवै समूहका प्रथम हुने विजेतालाई जनही ५० हजार, द्वितीयलाई ३५ हजार, तृतीयलाई २० हजार, चौथोलाई १५ हजार र पाँचौँलाई १० हजार नगद पुरस्कार प्रदान गरिने बैंकले जनाएको छ । त्यसैगरी, कर्पोरेटतर्फ महिला तथा पुरुष दुवै समूहमा प्रथम हुने विजेतालाई ३० हजार, द्वितीयलाई जनही २० हजार, तृतीयलाई १५ हजार, चौथोलाई १० हजार र पाँचौँलाई पाँच हजार नगद पुरस्कार प्रदान गरिने बताइएको छ । खुलातर्फको १० किलोमिटर दौड विकास बैंकको केन्द्रीय कार्यालय रहेको भवन, बालुवाटारबाट सुरु भई बुढानीलकण्ठ नगरपालिका ३ को कार्यालय भवन परिसरसम्म पुगेर सोही मार्ग हुँदै पुनः बालुवाटारमा समापन हुने बताइएको छ । त्यस्तै, कर्पोरेटतर्फको पाँच किलोमिटर दौड बालुवाटारबाट सुरु भई बाँसबारीस्थित न्युरो अस्पतालसम्म पुगेर सोही मार्ग हुँदै बालुवाटारमा समापन हुने बताइएको छ । प्रतियोगिता थप व्यवस्थित, प्रतिस्पर्धात्मक तथा प्रभावकारी बनाउन बैंकले एनआरएस स्पोर्ट्स फाउण्डेसनसँग सहकार्य गरेको छ ।