भक्तपुर । भक्तपुरमा नेपाल प्रिमियर लिग (एनपीएल) को फाइनल खेलको विशेष प्रदर्शनसँगै लोकप्रिय सांगीतिक समूह कोबवेब ब्यान्डको लाइभ कन्सर्ट आयोजना हुने भएको छ । नेवा ननीको आयोजनामा आगामी मङ्सिर ५ गते ‘एनपीएल ग्रान्ड फाइनल स्क्रिनिङ एन्ड म्युजिक नाइट’ कार्यक्रम हुन लागेको हो । कार्यक्रममा एनपीएलको फाइनल खेल ठूलो पर्दामा प्रदर्शन गरिनुका साथै कोबवेब ब्यान्डले प्रत्यक्ष सांगीतिक प्रस्तुति दिनेछ । खेलकुद, संगीत र नेवारी संस्कृतिलाई एउटै मञ्चमा जोड्ने उद्देश्यले कार्यक्रम आयोजना गर्न लागिएको नेवा ननीका सञ्चालक आशाराम फाजुले जानकारी दिनुभयो । कार्यक्रममा सहभागी हुन २०० र ५०० रुपैयाँका दुई प्रकारका प्रवेश टिकटको व्यवस्था गरिएको आयोजकले जनाएको छ । २०० रुपैयाँको टिकटमा निःशुल्क कफी र ५०० रुपैयाँको टिकटमा निःशुल्क बियर उपलब्ध गराइनेछ । कार्यक्रममा नेवारी मौलिक परिकार तथा विशेष आतिथ्यको व्यवस्थासमेत रहनेछ । कार्यक्रम व्यवस्थापन निर्देशकको जिम्मेवारी स्नेहा गारुले सम्हाल्नुभएको छ भने पोखरा एभेन्जर्सका निर्देशक अमित लोहनी पनि कार्यक्रममा जोडिनुभएको छ । नेवा ननीले नेवारी मौलिक खानपान, कला र संस्कृतिको प्रवर्द्धन गर्नुका साथै स्थानीयस्तरमा खेलकुद तथा सांगीतिक गतिविधिलाई प्रोत्साहन गर्ने उद्देश्यले कार्यक्रम आयोजना गर्न लागेको जनाएको छ ।
भक्तपुरमा एनपीएल फाइनलको स्क्रिनिङसँगै कोबवेब ब्यान्डको लाइभ कन्सर्ट हुने

Read Complete Original Article
Published originally on हिमालय टाइम्स






