फ्लेक्सटेक्सले १५औँ वार्षिकोत्सव मनाउँदै

काठमाडौं । स्वदेशमै नेपाली युवाका लागि अर्थपूर्ण रोजगारीका अवसर सिर्जना गर्ने र उनीहरूलाई अन्तर्राष्ट्रिय व्यावसायिक अवसरहरूसँग जोड्ने स्पष्ट दूरदृष्टिका साथ स्थापना भएको फ्लेक्सटेक्स नेपालले आफ्नो यात्राको १५ वर्ष पूरा गर्दैछ । स्थापनाकालदेखि नै संस्थाले नेपाली प्रतिभालाई आफ्नै देशमा रहेर व्यावसायिक अनुभव हासिल गर्न, आफ्नो ज्ञान र क्षमता विकास गर्न तथा दीर्घकालीन व्यावसायिक जीवन निर्माण गर्न अवसर प्रदान गर्ने उद्देश्यलाई प्राथमिकतामा राख्दै आएको छ । स्थापनाको प्रारम्भिक वर्षमा केवल १३ जना कर्मचारीबाट सुरु भएको फ्लेक्सटेक्सको यात्रा हाल करिब छ सय जना कर्मचारीको सशक्त कार्य बलसम्म विस्तार भएको छ । विगत १५ वर्षमा भएको उल्लेखनीय वृद्धिसँगै समग्र फ्लेक्सटेक्स संस्थाको एक महत्त्वपूर्ण अंगका रूपमा स्थापित भएको संस्थाले जनाएको छ । आफ्नो ऐतिहासिक यात्राको महत्त्वपूर्ण उपलब्धि मनाउन फ्लेक्सटेक्स नेपालले १४ नोभेम्बरमा १५औँ वार्षिक उत्सव आयोजना गर्दैछ । कार्यक्रममा संस्थाका कर्मचारी, नेतृत्व, साझेदार, शुभेच्छुक तथा विशिष्ट अतिथिहरूको सहभागिता रहने बताइएको छ ।