नेतन्याहूलाई सत्ताबाट हटाउन र सरकार गठनमा आइजेनकोटका चार सर्त

काठमाडौं । इजरायलको विपक्षी गठबन्धनको नेतृत्व गरिरहेका पूर्वसेना प्रमुख तथा ‘यशार’ पार्टीका नेता गादी आइजेनकोटले नयाँ सरकार गठन गर्न आफू तयार रहेको बताएका छन् । हालैको निर्वाचनमा प्राप्त अग्रतालाई प्रधानमन्त्री बेन्जामिन नेतन्याहूको सरकारलाई सत्ताबाट हटाउन प्रयोग गर्ने उनको योजना छ । आइजेनकोटले आफ्ना चार सर्तमा सहमत हुने जुनसुकै दलसँग गठबन्धन गर्न सकिने बताएका छन् । निर्वाचनमा १२० सदस्यीय नेसेट (संसद्) मा नेतन्याहूविरोधी दलहरूले ६७ सिट जितेका छन् भने सत्तारूढ गठबन्धनले ५३ सिट पाएको छ । विपक्षी खेमाका ६७ सांसदमध्ये ४८ जना जायोनिस्ट दलका र १९ जना दुई अरब पार्टीका छन् । यद्यपि, दुवै खेमासँग आफ्नै बलमा सरकार गठनका लागि आवश्यक ६१ सिटको बहुमत छैन । त्यसैले नयाँ गठबन्धन गठनका लागि राजनीतिक रस्साकस्सी जारी छ । आइजेनकोटले गठबन्धनमा सहभागी हुन चाहने दलहरूसामु चार सर्त राखेका छन् । यसमा इजरायलका सबै नागरिकका लागि अनिवार्य सैन्य सेवा लागु गर्ने र सेनामा भर्नाबाट छुट दिने व्यवस्था पूर्ण रूपमा अन्त्य गर्ने, गठबन्धनमा सहभागी सबै दलले इजरायललाई यहुदी, लोकतान्त्रिक, उदारवादी र समतामूलक राज्यका रूपमा स्वीकार गर्ने, इजरायलको स्वतन्त्रता घोषणापत्रमा उल्लेखित मूल्यप्रति पूर्ण प्रतिबद्धता जनाउने र हमासलाई आतंकवादी संगठन मान्ने तथा गाजा पट्टीमा उसको सैन्य क्षमता र शासन अन्त्य गर्ने लक्ष्यमा सहमत हुने रहेका छन् । अक्टोबर ७ हमलाबारे छानबिन आयोग गठन प्राथमिकता आइजेनकोटका अनुसार नयाँ संसद् गठन भएपछि उनको पहिलो प्राथमिकता सन् २०२३ अक्टोबर ७ को हमलाअघि र त्यसक्रममा भएका सुरक्षा कमजोरीको छानबिन गर्न राज्यस्तरीय आयोग गठन गर्नु हुने बताएका छन् । साथै, निवर्तमान सरकारले पारित गरेका विवादित न्यायिक सुधारसम्बन्धी कानुन खारेज गर्ने उनको योजना छ । पूर्वप्रधानमन्त्री नफ्ताली बेनेटको ‘बेयाचाद’ गुटले पनि आइजेनकोटलाई समर्थन गरेको छ । बेनेटले राष्ट्रपति इसाक हर्जोगलाई नयाँ सरकार गठनका लागि आइजेनकोटलाई मनोनीत गर्न सिफारिस गर्ने बताएका छन् । निर्वाचनपछि देखिएको राजनीतिक गतिरोधबीच बेनेटले सामाजिक सञ्जाल एक्समा आफूले मतदाताको निर्णयको सम्मान गर्ने बाचा गरेको उल्लेख गर्दै आइजेनकोटलाई समर्थन गर्ने घोषणा गरेका हुन् । त्यसपछि आइजेनकोटले बेनेटलाई धन्यवाद दिएका छन् । बेनेटले आइजेनकोटलाई सम्बोधन गर्दै दुवै मिलेर इजरायललाई सही बाटोमा फर्काउने बताएका छन् । राष्ट्रपति हर्जोगले भने राजनीतिक नेताहरूलाई निर्वाचन परिणाम स्वीकार गर्न आग्रह गरेका छन् । ‘द टाइम्स अफ इजरायल’का अनुसार नोभेम्बर ४ मा आधिकारिक निर्वाचन परिणाम प्राप्त गरेपछि हर्जोगले राजनीतिक दलका नेताहरूसँग परामर्श सुरु गर्नेछन् । नयाँ संसद्का सदस्यले नोभेम्बर १० सम्म शपथ लिनुपर्नेछ । निर्वाचनपछि कुनै पनि प्रमुख राजनीतिक खेमाले स्पष्ट बहुमत नल्याएकाले सरकार गठन चुनौतीपूर्ण बनेको छ । निर्धारित समयभित्र सरकार गठन हुन नसके इजरायलमा पुनः निर्वाचन हुन सक्ने बताइएको छ ।