Tuesday, November 17, 2026||
MultiKhabarMultiKhabar

ट्रम्प, सी र पुटिनबीचको भेटवार्ताले इरान–अमेरिका, रूस–युक्रेन युद्ध अन्त्य होला ?

Share:WhatsAppFacebookX (Twitter)Telegram
ट्रम्प, सी र पुटिनबीचको भेटवार्ताले इरान–अमेरिका, रूस–युक्रेन युद्ध अन्त्य होला ?
Photo / Coverage: विश्वखबर

काठमाडौं– चीनले अमेरिका, रूस र चीनका राष्ट्रपतिबीच विश्व शान्तिका विषयमा गहन छलफल हुने जनाएको छ । अमेरिकी राष्ट्रपति डोनाल्ड ट्रम्प, रूसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङबीच यसै साता चीनमा पहिलोपटक त्रिपक्षीय शिखर वार्ता हुन लागेको हो । चिनियाँ विदेश मन्त्रालयले सोमबार तीन देशका राष्ट्रपतिबीच विश्व शान्ति संरक्षण र अन्तर्राष्ट्रिय सम्बन्धमा स्थायित्व प्रवर्द्धन गर्ने विषयमा गहन छलफल हुने जानकारी दिएको हो । तीनै नेताबीच बिहीबार चीनको दक्षिणी सहर सेन्जेनमा एसिया प्रशान्त आर्थिक सहयोग (एपेक) शिखर सम्मेलनको अवसरमा भेटवार्ता हुने कार्यक्रम छ । चिनियाँ विदेश मन्त्रालयकी प्रवक्ता माओ निङले यो भेटवार्ता विश्व राजनीतिका लागि महत्वपूर्ण हुने बताएकी छन् । उनका अनुसार वार्तामा विश्व शान्ति र स्थायित्व कायम गर्ने विषयलाई प्राथमिकता दिइनेछ । युक्रेन युद्धबारे छलफल हुने सम्भावना न्यून अमेरिकी राष्ट्रपति ट्रम्पले यसअघि नै तीन नेताबीचको भेटवार्ता रोचक हुने बताएका थिए । नोभेम्बर ८ मा फ्लोरिडाको विमानस्थलमा सञ्चारकर्मीसँग कुरा गर्दै उनले आणविक निशस्त्रीकरणसहित विभिन्न विषयमा छलफल हुने बताएका थिए । उनले इरानमा जारी युद्ध अन्त्य गर्ने प्रयासबारे पनि छलफल हुन सक्ने संकेत गरेका थिए । तर ट्रम्पले आफ्नो अभिव्यक्तिमा रूस–युक्रेन युद्धबारे भने उल्लेख गरेका थिएनन् । गत महिना प्रकाशित वाल स्ट्रिट जर्नलको एक रिपोर्टअनुसार रूसी राष्ट्रपति पुटिनले मस्कोको हितअनुकूल युक्रेन युद्ध अन्त्य गर्ने शान्ति सम्झौताका लागि यो वार्तालाई उपयोग गर्न चाहेका छन् । यद्यपि, अमेरिकी अधिकारीहरूले ट्रम्पले यस भेटवार्तामा युक्रेनको विषय उठाउने सम्भावना नरहेको बताएका छन् । चीन भ्रमणपछि जर्मनीका राष्ट्रपति फ्र्याङ्क–वाल्टर स्टाइनमायरले युक्रेन युद्धबारे प्रश्न गर्दा सी चिनफिङ असहज देखिएको बताएका थिए । सीले युक्रेन युद्ध युरोपसँग सम्बन्धित विषय भएकाले शान्ति प्रक्रियामा युरोपेली देशहरू पनि सहभागी हुनुपर्ने स्पष्ट पारेको स्टाइनमायरको भनाइ थियो । जर्मन चान्सलर फ्रेडरिक मर्जले पनि शुक्रबार ट्रम्पलाई पुटिनसँगको वार्तामा युक्रेनबारे कुनै अप्रत्याशित निर्णय नगर्न आग्रह गरेका थिए । उनले युरोप र युक्रेनको पक्षमा रहेको साझा धारणा कायम राख्न ट्रम्पलाई सुझाव दिएका थिए । आणविक निशस्त्रीकरणमा सहमति सम्भव छ ? तीन नेताबीचको वार्तामा आणविक हतियार नियन्त्रण र निशस्त्रीकरणको विषय पनि महत्वपूर्ण बन्न सक्ने देखिएको छ । अमेरिकाले भविष्यमा हुने आणविक हतियार नियन्त्रणसम्बन्धी सम्झौतामा चीनलाई पनि सहभागी गराउन चाहेको छ । तर चीनले त्यसअघि अमेरिका र रूसले आफ्नो आणविक हतियारको भण्डार घटाउनुपर्ने अडान राख्दै आएको छ । गत फेब्रुअरीमा अमेरिका र रुसबीचको आणविक हतियार नियन्त्रणसम्बन्धी सन्धिको अवधि समाप्त भएपछि ट्रम्पले व्यापक निशस्त्रीकरण वार्ताको प्रस्ताव गरेका थिए । तर चीनले उक्त प्रस्ताव अस्वीकार गरेको थियो । यसै साता चिनियाँ विदेशमन्त्री वाङ यी र अमेरिकी विदेशमन्त्री मार्को रुबियोबीच भएको टेलिफोन वार्तामा विश्व शान्ति र आणविक निशस्त्रीकरणका लक्ष्य हासिल गर्न उच्चस्तरीय संवादको महत्वबारे सहमति भएको अमेरिकी विदेश मन्त्रालयले जनाएको छ । संयुक्त राष्ट्रसङ्घका महासचिव एन्टोनियो गुटेरेसले सोमबार तीनै नेताले अर्थपूर्ण आणविक निशस्त्रीकरणका लागि प्रतिबद्धता जनाए त्यो विश्वकै लागि ठूलो उपलब्धि हुने बताएका छन् । इरान युद्धको अवस्था के छ ? अमेरिका र इजरायलले फेब्रुअरी २८ मा इरानमाथि आक्रमण सुरु गरेपछि मध्यपूर्वमा जारी युद्ध पछिल्लो समय केही मत्थर भएको छ । तर द्वन्द्वसँग सम्बन्धित प्रमुख विषयहरू अझै समाधान भएका छैनन् । पछिल्ला साताहरूमा निर्वाचनका कारण अमेरिका र इजरायलले ठूला सैन्य आक्रमण रोकेका छन् । तर इरानले विश्वको महत्वपूर्ण तेल तथा प्राकृतिक ग्यास आपूर्ति मार्ग होर्मुज जलडमरूमध्यमा आफ्नो नियन्त्रण कायम राख्ने प्रयास जारी राखेको छ । उक्त जलमार्ग प्रयोग गर्ने अनुमति नलिएका जहाजमाथि पनि इरानले आक्रमण गरिरहेको समाचारमा उल्लेख छ । अमेरिकी राष्ट्रपति ट्रम्पले अक्टोबरमा मध्यावधि निर्वाचनअघि इरानमाथि फेरि सीमित सैन्य कारबाही हुन सक्ने सङ्केत गरेका थिए । तर त्यसको समयसीमा भने खुलाएका थिएनन् । यसअघि अप्रिलमा पाकिस्तानको मध्यस्थतामा अमेरिका र इरानबीच भएको शान्ति वार्ताले पनि दीर्घकालीन समाधान निकाल्न सकेको थिएन । इरानको महत्वपूर्ण आर्थिक साझेदार चीनले भने यस द्वन्द्वमा मध्यस्थकर्ताको भूमिका निर्वाह गर्ने प्रयास गर्दै आएको छ । बेइजिङले पछिल्ला साताहरूमा मध्यपूर्वका विभिन्न देशका नेता तथा कूटनीतिज्ञलाई चीनमा आमन्त्रण गरी द्वन्द्वरत पक्षलाई पुनः वार्ताको टेबलमा फर्काउन पहल गरेको छ । चीनले मध्यपूर्वमा थप तनाव बढ्न नदिनुलाई आफ्नो प्राथमिकतामा राखेको जनाएको छ । अमेरिका, रूस र चीनका राष्ट्रपतिबीच हुन लागेको त्रिपक्षीय वार्तामा युक्रेन, इरान र आणविक निशस्त्रीकरणका विषयले कति स्थान पाउँछन् भन्ने विषयलाई अन्तर्राष्ट्रिय समुदायले चासोका साथ हेरिरहेको छ । –एजेन्सी

Share:WhatsAppFacebookX (Twitter)Telegram

Read Complete Original Article

Published originally on विश्वखबर

Visit Publisher Site →

Related News

🇳🇵 Nepal
करदाताको संख्या ८० लाख नाघ्यो, कात्तिकसम्म राजस्व संकलनमा १३.३ प्रतिशतले सुधार
Latest NewsJust now

करदाताको संख्या ८० लाख नाघ्यो, कात्तिकसम्म राजस्व संकलनमा १३.३ प्रतिशतले सुधार

काठमाडौं । नेपालमा व्यावसायिक र व्यक्तिगत स्थायी लेखा नम्बर (प्यान) लिने करदाताको संख्या ८० लाख नाघेको छ । राष्ट्रिय कर दिवसको अवसरमा आयोजित समारोहमा आन्तरिक राजस्व विभागका उपमहानिर्देशक जनकराज शर्माले संस्थागत... ...

रातोपाटी
रुसी विमानद्वारा जापानी हवाई क्षेत्र उल्लङ्घन
Latest NewsJust now

रुसी विमानद्वारा जापानी हवाई क्षेत्र उल्लङ्घन

जापान सरकारका प्रवक्ता मिनोरु किहाराका अनुसार मङ्गलबार बिहान फुकुओकाको दक्षिणपश्चिममा पर्ने ओकिनोसिमा टापुनजिकै रुसी विमान प्रवेश गरेका थिए ...

कान्तिपुर
बाढीपहिरोको चपेटामा म्याग्दीका जलविद्युत् आयोजना
Latest NewsJust now

बाढीपहिरोको चपेटामा म्याग्दीका जलविद्युत् आयोजना

म्याग्दी । मनसुनजन्य विपद्ले म्याग्दीका जलविद्युत् आयोजनाको विद्युत् उत्पादन, प्रसारण र निर्माण कार्य प्रभावित बनाएको छ । कालीगण्डकी र म्याग्दी नदी तथा तिनका सहायक खोलामा आएको बाढीपहिरोले सञ्चालनमा रहेका र निर्माणाधीन आयोजनाका बाँध, विद्युत्गृह, सुरुङ, प्रसारण लाइन र पहुँचमार्गमा क्षति पुर्‍याएको हो । विपद्का कारण केही आयोजना पूर्ण रूपमा बन्द भएका छन् भने केहीको परीक्षण उत्पादन र निर्माण कार्य प्रभावित भएको ...

केन्द्रबिन्दु
दुई सय ३६ वर्ष पुरानो नेपाल एकीकरणको साक्षी अमरगढी किल्ला [तस्बिरहरू]
Latest NewsJust now

दुई सय ३६ वर्ष पुरानो नेपाल एकीकरणको साक्षी अमरगढी किल्ला [तस्बिरहरू]

डडेल्धुरा जिल्लाको सदरमुकाम खलङ्गामा अवस्थित नेपालको एकीकरण अभियानको महत्वपूर्ण इतिहास बोकेको स्थल हो अमरगढी किल्ला । ...

हाम्राकुरा
Multikhabar App

All Information In One Place

Real-time headlines from trusted sources. Get the app now — stay updated, inspired, and ahead with breaking news!

Get it on Google Play