रसुवा। गत भदौ १० गते ल्हेन्दे खोलामा आएको बाढीका कारण विस्थापित रसुवाको टिमुरेका बाढीपीडित आफ्नै थातथलो फर्किएर अस्थायी टेन्टमा बस्न थालेका छन्। विस्थापित ६८ घरधुरीमध्ये ४८ जना मङ्सिर १ गतेदेखि टिमुरेको खैँदीमा टेन्ट टाँगेर बस्न थालेका हुन्। बाढीपछि केही पीडित कोठा भाडामा लिएर बसेका छन् भने केही काठमाडौंमा बस्न नसकेपछि गाउँ फर्किएका छन्। स्थानीय कामीनुर्पु तामाङका अनुसार ६८ घरधुरीमध्ये ४८ जना गाउँ फर्किएका छन्। जन्मभूमि, परम्परा र रीतिरिवाज जोगाउने उद्देश्यले आफूहरू गाउँ फर्किएको उनले बताए। सरकारले अस्थायी बसोबासको व्यवस्था कहिलेसम्म गर्ने भन्ने टुङ्गो नलगाउँदा पीडित अन्योलमा रहेको उनको भनाइ छ। विभिन्न सङ्घसंस्थाले थप टेन्ट र राहत सामग्री उपलब्ध गराउने आश्वासन दिएको उनले जानकारी दिए। बाढीपीडितमध्ये करिब ९० प्रतिशत काठमाडौंमा बस्न नसक्ने अवस्था रहेको उल्लेख गर्दै उनले खेतीकिसानी र पशुपालन गरेर जीवनयापन गर्ने सोचका साथ गाउँ फर्किएको बताए। टिमुरेका अर्का स्थानीय पेमा दोर्जे घलेका अनुसार यसअघि मुस्ताङ गुम्बामा २०७ पुरुष र २०४ महिला गरी ४११ जना बाढीपीडित आश्रित थिए। तीमध्ये १५१ बालबालिका र ८० जना वृद्धवृद्धा थिए। सरकारले पीडितको अस्थायी बसोबास कहाँ र कसरी व्यवस्थापन गर्ने भन्नेबारे अहिलेसम्म ठोस निर्णय नगर्दा उनीहरू अन्योलमा परेको उनले बताए।
टिमुरे फर्किए बाढीपीडित

Read Complete Original Article
Published originally on नेपालन्युज






