काठमाडौं । स्वरूप परिवर्तन गरी चर्को आवाज निकाल्दै सडकमा गुडाउने बुलेट मोटरसाइकलमाथि ट्राफिक प्रहरीले कारबाही तीव्र पारेको छ । काठमाडौं उपत्यका ट्राफिक प्रहरी कार्यालयले पछिल्लो एक सातामा ४०१ वटा बुलेट मोटरसाइकल नियन्त्रणमा लिएको छ । उपत्यका ट्राफिक प्रहरी कार्यालयका एसपी नरेश सुवेदीका अनुसार स्वरूप परिवर्तन गरेर चर्को आवाज निकाल्ने तथा सडकमा स्टन्ट गर्ने मोटरसाइकल नियन्त्रणमा लिइएको हो । अनुगमनका क्रममा कतिपय मोटरसाइकलको साइलेन्सर पाइपबाट आगोको झिल्कासमेत निस्कने गरेको पाइएको उनले बताए । यस्ता मोटरसाइकलका कारण अन्य सवारी चालक तथा यात्रुलाई असहज हुनुका साथै सडक दुर्घटनाको जोखिमसमेत बढ्ने प्रहरीको भनाइ छ । विशेषगरी चर्को आवाजले बालबालिका तथा ज्येष्ठ नागरिकको स्वास्थ्यमा असर पार्नुका साथै सार्वजनिक शान्तिसमेत खलबलिने एसपी सुवेदीले बताए । नियन्त्रणमा लिइएका मोटरसाइकललाई कम्पनीले उत्पादन गर्दाको मूल स्वरूपमा फर्काएर आवश्यक जरिवाना तिराएपछि मात्रै सम्बन्धित चालकलाई हस्तान्तरण गरिने उनले जानकारी दिए । सवारी तथा यातायात व्यवस्था ऐन, २०४९ को दफा ३९ अनुसार अधिकारप्राप्त अधिकारीको स्वीकृतिबिना सवारीसाधनको स्वरूप परिवर्तन गर्न पाइँदैन । तर, कतिपय बुलेट चालकले साइलेन्सर परिवर्तन गरी ठूलो आवाज निकाल्ने र सडकमा स्टन्ट गर्ने गरेको गुनासो आउने गरेको छ । यस्ता गतिविधि नियन्त्रण गर्न ट्राफिक प्रहरीले नियमित अनुगमन गर्दै आएको छ । नियमविपरीत स्वरूप परिवर्तन गरिएका तथा सार्वजनिक सडकमा जोखिमपूर्ण गतिविधि गर्ने मोटरसाइकलमाथि कारबाहीलाई निरन्तरता दिने प्रहरीले जनाएको छ ।
चर्को आवाज निकाल्ने र ‘मोडिफाई’ गरिएका ४०१ बुलेट प्रहरीको कब्जामा

Read Complete Original Article
Published originally on केन्द्रबिन्दु





![दार्चुलाको हुनैनाथ मन्दिर र आसपासको प्राकृतिक दृश्य [तस्बिरहरू]](https://fdcdn.prixacdn.net/media/albums/photo-16_9e7d0960_GdHK2Blq8G.jpeg)
