गोदावरी मेलामा एक करोड ४६ लाख बढी कारोबार

ललितपुर । फ्लोरिकल्चर एसोसिएसन नेपाल(फ्यान)को आयोजनामा ललितपुरको जावलाखेलमा सम्पन्न १९औँ गोदावरी फूलको प्रतियोगितात्मक प्रदर्शनीमा एक करोड ४६ लाखभन्दा बढीको कारोबार भएको छ । मेलाको अन्तिम दिन छ हजार पाँच सय ८१ जनाले मेला अवलोकन गरेका तथा २४ लाख ९० हजार रुपैयाँभन्दा बढीको कारोबार भएको फ्यानले जनाएको छ । मेला अवधिमा मौसम प्रतिकूलताका बाबजुद पनि कारोबार र अवलोकनकर्ताको उपस्थिति सोचेअनुरूप नै भएको मेला संयोजक सुमन महर्जनले बताउनुभयो । उहाँका अनुसार मेलाको पहिलो दिन आठ हजार नौ सय, दोस्रो दिन चार हजार दुई सय, तेस्रो दिन १० हजार सात सय, चौथो दिन सात हजार दुई सय ५० र पाँचौं दिन छ हजार सात सय ५६ जनाले अवलोकन गरेका थिए । मेलाको पाँचौं दिन २१ लाख ५० हजारको कारोबार भएको थियो । बुधबार मेलाको छैटौं तथा अन्तिम दिन २४ लाख ९० हजार रुपैयाँभन्दा बढीको कारोबार भएको फ्यानले जनाएको छ । मेलाको समापनको दिन मेलामा सहभागी पुष्प व्यवसायीलाई प्रमाणपत्र वितरण गरिएको थियो । मेलास्थलमा विभिन्न लोक कलाकारहरूले सांस्कृतिक कार्यक्रमसमेत प्रस्तुत गरेका थिए ।