कुमार बेनकाे व्यंग्य -२८ जनाकाे लिस्टमा नपर्ने नि के पत्रकार भन्नू !

काठमाडौं । प्रधानमन्त्री बालेन्द्र शाहको सचिवालयले पत्रकार पक्राउ गर्न प्रहरीलाई २८ जनाको सूची पठाएको भन्ने समाचार सार्वजनिक भएपछि प्रधानमन्त्रीका मुख्य सल्लाहकार कुमार बेनले व्यंग्यात्मक टिप्पणी गरेका छन्। बेनले सामाजिक सञ्जालमा लेख्दै २८ जनाको सूचीमा को–को परे भन्ने जिज्ञासा व्यक्त गरेका छन्। उनले व्यंग्य गर्दै लेखेका छन्, ‘यो २८ जना पत्रकारमा को–को पर्‍याे हो ? २८ मा नपर्ने नि के पत्रकार भन्नू हैन साथी हो।’ यसअघि प्रधानमन्त्री शाहको सचिवालयले पत्रकार पक्राउ गर्न प्रहरीलाई २८ जनाको नाम पठाएको दाबी गरेर समाचार सार्वजनिक भएका थिए । समाचारअनुसार सुरुमा २८ जनाको सूची पठाइए पनि सात जनालाई नियन्त्रणमा लिने तयारी गरिएको थियो। यद्यपि, उक्त सूची सार्वजनिक भएको छैन। यसअघि शुक्रबार प्रहरीले विश्वमणि सुवेदी, धीरज बस्नेत र शोभराज बराललाई नियन्त्रणमा लिएर केही घण्टापछि रिहा गरेको थियो। तर, प्रधानमन्त्रीकी प्रेस विज्ञ दीपा दाहालले भने पत्रकार पक्राउ प्रकरणमा प्रधानमन्त्री, उनको सचिवालय र प्रधानमन्त्री कार्यालयको संलग्नता तथा पूर्वजानकारी नरहेको दाबी गरेकी थिइन्। घटनाबारे जानकारी पाएपछि प्रधानमन्त्रीले पक्राउ परेका पत्रकारलाई रिहा गर्न र समाचार कक्षमा धरपकड नगर्न निर्देशन दिएको उनको भनाइ थियो।