कांग्रेसको असली ‘भिलेन’ गगन होइन, गरिबी र बेरोजगारी हो : शशांक कोइराला

नेपाली कांग्रेसका नेता डा. शशांक कोइरालाले पार्टीभित्र एकअर्कालाई ‘भिलेन’ बनाउने प्रवृत्तिप्रति असन्तुष्टि व्यक्त गर्दै गरिबी, अशिक्षा र बेरोजगारी नै पार्टीको मुख्य चुनौती रहेको बताएका छन् ।शनिबार काठमाडौँमा आयोजित नेपाली कांग्रेसको १५औँ जिल्ला अधिवेशनलाई सम्बोधन गर्दै उनले गगन थापाप्रति लक्षित आलोचनाले उल्टै उनको चर्चा र महत्त्व बढाइरहेको टिप्पणी गरे । ‘हामीले गगन थापालाई यति धेरै महत्त्व किन दिन्छौँ ? तपाईं जति गाली गर्नुहुन्छ, उनको महत्त्व त्यति नै बढ्छ । त्यसैले उनको कुरै नगरौँ,’ उनले भने । राजनीतिमा फिल्मको हिरो र भिलेनको उदाहरण दिँदै कोइरालाले पार्टीभित्र पनि राजनीतिक भिलेन खोज्ने प्रवृत्ति देखिएको बताए । ‘फिल्ममा हिरोले भिलेनलाई मारेजस्तै हामी पनि राजनीतिक भिलेन खोजिरहेका छौँ, र त्यो पात्रका रूपमा गगन थापालाई देख्छौँ । तर त्यो हाम्रो भ्रम हो,’ उनले भने । पार्टीको वास्तविक चुनौतीबारे स्पष्ट पार्दै उनले भने, ‘हाम्रो असली भिलेन गरिबी, अशिक्षा र बेरोजगारी हो । तिनको विरुद्धमा लड्नु नै आजको आवश्यकता हो ।’ डा. कोइरालाले महाधिवेशनलाई पार्टीको भविष्य उजागर गर्ने ऐतिहासिक कडीका रूपमा व्याख्या गर्दै १५औँ महाधिवेशनलाई गम्भीरतापूर्वक लिन कार्यकर्ताहरूलाई आग्रह गरे । अधिवेशनको सफलतामा सहभागिताको ठूलो भूमिका रहने उल्लेख गर्दै उनले सुरुवाती चरणमा देखिएको उत्साहजनक उपस्थितिले अधिवेशन सफल हुने आभास दिएको बताए । राजनीतिमा ‘अरूलाई कुरूप देखाएर आफू सुन्दर बन्न नसकिने’ उनको भनाइ थियो । उनले पार्टीका कार्यक्रमहरूलाई निरन्तरता दिन र तल्लो तहदेखि नै संगठन बलियो बनाउन सक्रिय हुन कार्यकर्ताहरूलाई आग्रह गरे ।