एनपीएलमा पोखराको रेकर्ड, दियो अहिलेसम्मकै ठूलो लक्ष्य

काठमाडौं । सिद्धार्थ बैंक नेपाल प्रिमियर लिगमा पोखरा एभेन्जर्सले काठमाडौँ गोर्खाजविरुद्ध ऐतिहासिक प्रदर्शन गर्दै विशाल स्कोर खडा गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको पोखराले निर्धारित २० ओभरमा ३ विकेट गुमाएर २२४ रन बनाउँदै एनपीएल इतिहासमै अहिलेसम्मकै ठूलो स्कोरको कीर्तिमान बनाएको छ। पोखराको यो ऐतिहासिक इनिङ्समा शीर्ष क्रमका ब्याट्सम्यान कुशल भुर्तेल र युवराज सम्राले विस्फोटक साझेदारी गर्दै काठमाडौँका बलरहरूलाई निरीह बनाए। ओपनर अर्जुन कुमाल ५ रन बनाएर तेस्रो ओभरमै आउट भएपछि क्रिजमा आएका भुर्तेल र सम्राबीच दोस्रो विकेटका लागि १८६ रनको कीर्तिमानी साझेदारी भएको थियो। कुशल भुर्तेल शतक बनाउनबाट मात्र १ रनले चुके। उनले ५१ बलको सामना गर्दै ८ चौका र ८ छक्काको मद्दतले ९९ रनको सानदार पारी खेले। त्यस्तै, अर्का ओपनर युवराज सम्राले पनि उत्कृष्ट ब्याटिङ गर्दै ५५ बलमा ८ चौका र ५ छक्कासहित ८९ रन जोडे। इनिङ्सको अन्त्यतिर कप्तान चामिका करुणारत्नेले आक्रामक रूप देखाउँदै मात्र ७ बलमा १ चौका र २ छक्का प्रहार गरी अविजित १९ रन बनाए भने धनन्जय लक्षण २ रनमा अविजित रहे। बलिङतर्फ काठमाडौँ गोर्खाजका बलरहरू निकै महँगा साबित भए। काठमाडौँका लागि करण केसीले ४ ओभरमा ३४ रन खर्चेर सर्वाधिक २ विकेट लिए भने जहन्दद खानले ४ ओभरमा ४७ रन दिएर १ विकेट हात पारे। टोलीका मुख्य स्पिनर राशिद खानले ४ ओभरमा ५५ रन खर्चिँदा कुनै विकेट लिन सकेनन् भने सहन अराचिगेले ३ ओभरमा ४० रन, गणेश गौतमले ३ ओभरमा २५ रन र सन्तोष यादवले २ ओभरमा २१ रन खर्चिए। अंक तालिकाको पुछारमा रहेर प्रतियोगिताबाट बाहिरिसकेको पोखरा एभेन्जर्सले लिग चरणको आफ्नो अन्तिम खेलमा सानदार ब्याटिङ प्रदर्शन गर्दै काठमाडौँसामू २२५ रनको कठिन चुनौती पेश गरेको छ। प्लेअफमा स्थान सुरक्षित गरिसकेको काठमाडौँ गोर्खाजलाई खेल जित्नका लागि प्रतिओभर ११.२५ को रनरेटमा रन बनाउनुपर्ने दबाब रहेको छ।