९९औं विकल जयन्ती सम्पन्न

काडमाडौं । रमेश विकल साहित्य प्रतिष्ठानको प्रांगण आरुबारीमा ९९औं विकल जयन्ती आयोजना गरियो । विकल चोक, आरुबारीमा अवस्थित रमेश विकलको अर्धकदको प्रतिमामा माल्यार्पणलगत्तै रमेश विकल साहित्य प्रतिष्ठान भवन पुगेर संक्षिप्त स्मृतिसभाको आयोजना सम्पन्न भएको थियो । काठमाडौं उत्तरपूर्वी भेगका साहित्यकार, प्राध्यापक, समाजसेवी तथा स्थानीयको उपस्थितिमा सम्पन्न उक्त सभाको प्रमुख अतिथिका हैसियतमा बोल्दै गोकर्णेश्वर नगरपालिकाका नगरप्रमुख दीपककुमार रिसालले, लेखकले समाज केलाउँछ-कृति छोड्छ, सरकारले ती सम्पत्तिहरूलाई अभिलेखीकरण गर्न सघाउँछ भन्दै विकलको योगदान तथा उहाँसँगको निकटता बारे चर्चा गर्नुभयो । स्थानीय सरकार- गोकर्णेश्वर नगरपालिकाले विकलका ५२ कृति र छरिएका फुटकर रचनासमेत समेटेर रमेश विकल समग्र खण्डअन्तर्गत सातखण्डमा सम्पूर्ण कृति र रचनाको एकीकृत अभिलेखीकरण गर्ने महत्त्वाकांक्षी योजनाको अन्तिम ग्रन्थमा पुगेको समेत जानकारी दिनुभयो । महाकवि लक्ष्मीप्रसाद देवकोटा र रमेश विकलको तस्बिरमा माल्यार्पण गर्दै सुरु भएको उक्त सभाका प्रमुख वक्ता भाषा आयोगका माननीय सदस्य मातृका पोखरेलले समाजका भुइँमान्छे र तिनीहरूका उत्पीडनलाई केन्द्र बिन्दुमा राखेर प्रगतिशील लेखनमा विशिष्ट उँचाइ कायम गर्न रमेश विकल सफल रहनुभएको बताउनुभयो । साथै प्रगतिशील लेखक संघले यस वर्षबाट शक्ति लम्सालको स्मृतिमा स्थापना गरिएको पुरस्कारबाट कीर्तिशेष विकललाई अर्पण गरिन लागेको समाचारसमेत अवगत गराउनुभयो । कार्यक्रमका सभापति-रमेश विकल साहित्य प्रतिष्ठानका उपाध्यक्ष तथा नेपाल ललितकला प्रज्ञा-प्रतिष्ठानका पूर्वकुलपति के के कर्माचार्यले विकलसँगको कला क्षेत्रको सामिप्य, उक्त प्रतिष्ठानको संस्थापनाकालदेखिको योगदान र विकलका बहुप्रतिभाको स्मरण गर्दै उपस्थित सम्पूर्ण समुदायलाई आभार प्रकट गर्नुभयो । कार्यक्रममा स्वागत मन्तव्य संस्थाका कोषाध्यक्ष शाम्बकुमार चालिसे र सञ्चालन आलोक चालिसेको रहको थियो ।