काठमाडौं । प्रधानमन्त्री बालेन्द्र शाह(बालेन) मंसिर ६ गते भारत भ्रमणमा जाने भएका छन् । करिब २५ घण्टा भारतमा बिताएर उनी मंसिर ७ गते स्वदेश फर्किने कार्यक्रम छ। उनी मंसिर ६ गते दिउँसो १:२५ बजे नेपाल वायुसेवा निगमको नियमित उडानबाट काठमाडौं हुँदै दिल्ली प्रस्थान गर्नेछन् । मंसिर ७ गते अपराह्न ४:२० बजे नेपाल वायुसेवा निगमकै नियमित उडानबाट उनी स्वदेश फर्कने बताइएकाे छ । भ्रमणको औपचारिक कार्यतालिका भने सार्वजनिक भइसकेको छैन । तर, भ्रमणका क्रममा नेपालले भारतसँग २ लाख करोड भारतीय रुपैयाँ बराबरको आर्थिक सहयोग माग्ने तयारी गरेको बताइएको छ । प्रस्तावमा १ लाख करोड सहुलियतपूर्ण ऋण र १ लाख करोड अनुदान समावेश छन् । अनुदानमध्ये ५० अर्ब रसुवा बाढीपछिको पुनर्निर्माण र ५० अर्ब बुटवल–पोखरा एक्सप्रेसवेका लागि प्रस्ताव गर्ने तयारी छ । नेपालले गौतमबुद्ध र पोखरा अन्तर्राष्ट्रिय विमानस्थलका लागि थप हवाई प्रवेशमार्ग उपलब्ध गराउन पनि भारतसँग आग्रह गर्नेछ । नेपालगञ्ज र महेन्द्रनगरबाट हवाई रुट खोल्ने तथा नेपाली सहरलाई भारतका दोस्रो तहका सहरसँग सीधा हवाई सम्पर्कमा जोड्ने विषयसमेत छलफलमा उठ्न सक्नेछ । भारतले भने बागडोगरा र रक्सौलका अन्तर्राष्ट्रिय उडानका लागि नेपाली हवाई क्षेत्र प्रयोग गर्ने विषयमा चासो राखेको छ । त्यस्तै, पञ्चेश्वर बहुउद्देश्यीय आयोजना, विद्युत् व्यापार, माथिल्लो तामाकोसीको बिजुली खरिद, बंगलादेशमा विद्युत् निर्यात सहजीकरण र महाकाली सिँचाइ आयोजनाका विषय पनि भ्रमणका एजेन्डामा छन् । चिनियाँ ठेकेदार संलग्न आयोजनाबाट उत्पादित विद्युत् भारतले खरिद गर्ने वातावरण बनाउन नेपालले आग्रह गर्ने तयारी गरेको छ । पूर्वाधारतर्फ रक्सौल–काठमाडौं रेलमार्ग, अयोध्या–जनकपुर रेल सेवा, पनौतीस्थित नेपाल प्रहरी प्रतिष्ठान, दार्चुला पुल, भैरहवा एकीकृत जाँच चौकी र महाकालीमा मोटरेबल पुल निर्माणका विषयमा छलफल हुने अपेक्षा छ । मंसिर ७ गते प्रधानमन्त्री बालेन र भारतीय प्रधानमन्त्री नरेन्द्र मोदीले अयोध्या–जनकपुर साप्ताहिक रेल सेवा भर्चुअल माध्यमबाट उद्घाटन गर्ने सम्भावना पनि छ । दोधारा–चाँदनी एकीकृत जाँच चौकी, तल्लो अरुण जलविद्युत् आयोजना र सिलिगुडी–चाराली पेट्रोलियम पाइपलाइनको संयुक्त शुभारम्भको विषयसमेत तयारीमा रहेको बताइएको छ । सीमा विवादका विषयमा भने कालापानी, लिपुलेक, लिम्पियाधुरा र सुस्ताको मुद्दा औपचारिक छलफलमा समेटिने निश्चित भइसकेको छैन । प्रधानमन्त्री बनेपछि एक वर्ष विदेश भ्रमण नगर्ने बताएका बालेन यसअघि संयुक्त राष्ट्रसंघको महासभामा सहभागी हुन न्युयोर्क गएका थिए । भारत भ्रमण भने उनको पहिलो औपचारिक द्विपक्षीय भ्रमण हुनेछ ।
२ दिने भारत भ्रमणमा प्रधानमन्त्री बालेनका के–के हुनेछन् एजेन्डा ?

Read Complete Original Article
Published originally on केन्द्रबिन्दु






