हेटौँडामा प्रहरी सहायक हवल्दार मृत फेला

हेटौँडा । हेटौँडा उपमहानगरपालिका-८ ओमनगरमा एक प्रहरी सहायक हवल्दार झुन्डिएको अवस्थामा मृत फेला परेका छन् । मंगलबार बिहान करिब ४ः३० बजे ओमनगर गेटअगाडि रहेको एक घरनजिकै जस्ताको ट्रसमा प्रहरी सहायक हवल्दार अर्जुन गुरुङ मृत अवस्थामा फेला परेका हुन् । बिहान मर्निङ वाकमा निस्किएका एक व्यक्तिले गुरुङलाई झुन्डिएको अवस्थामा देखेपछि इलाका प्रहरी कार्यालय पशुपतिनगरमा खबर गरेका थिए । सूचना प्राप्त हुनासाथ प्रहरी टोली घटनास्थल पुगेको थियो । जिल्ला प्रहरी कार्यालय मकवानपुरकाअनुसार मृतक गुरुङ गोरखाको आरुघाट गाउँपालिका-३ पोखरीटोलका स्थायी बासिन्दा हुन् । करिब ३६ वर्षीय गुरुङ हाल लमजुङस्थित इलाका प्रहरी कार्यालय भोटेओडारमा कार्यरत थिए । प्रहरीले घटनास्थलबाट सुसाइड नोटसमेत फेला पारेको जनाएको छ । उक्त नोटमा उल्लेखित विषयवस्तुबारे भने प्रहरीले विस्तृत जानकारी सार्वजनिक गरेको छैन । गुरुङको मृत्युको कारण खुल्न नसकेको र घटनासँग सम्बन्धित थप विषयमा अनुसन्धान भइरहेको प्रहरीले जनाएको छ ।