हिमालय जलवायु उत्थानशीलता संयन्त्र बनाउन नेपालले माग्यो चीनको साथ

काठमाडौं । हिमाली क्षेत्रमा जलवायु परिवर्तनबाट बढ्दै गएको जोखिम न्यूनीकरणका लागि नेपालले चीनसँग क्षेत्रीय सहकार्यको प्रस्ताव गरेको छ। नेपाल, भारत र चीनको नेतृत्वमा हिमालय जलवायु उत्थानशीलता संयन्त्र स्थापना गर्न चीनको सहयोग र समर्थन अपेक्षा गरिएको हो। जलवायु परिवर्तनसम्बन्धी संयुक्त राष्ट्रसङ्घीय महासन्धिका पक्ष राष्ट्रहरूको ३१औँ सम्मेलन (कोप–३१) का क्रममा बिहीबार टर्कीको अन्ताल्यामा भएको द्विपक्षीय भेटवार्तामा कृषि, वन तथा पर्यावरणमन्त्री गीता चौधरीले उक्त प्रस्ताव राखेकी हुन्। चीनका पारिस्थितिकी तथा वातावरणमन्त्री ह्वाङ रुनछ्युसँगको भेटमा मन्त्री चौधरीले जलवायु परिवर्तनले हिमाली क्षेत्रमा जोखिम बढाउँदै लगेको र यसको प्रभाव सीमापारसमेत पर्ने भएकाले क्षेत्रीय सहकार्य आवश्यक रहेको बताएकी थिइन्। गत अगस्ट २६ मा रसुवा–भोटेकोशी क्षेत्रमा आएको विपद्पछि चीनले उपलब्ध गराएको सहयोगप्रति उनले आभार व्यक्त गरिन्। साथै, माथिल्लो तटीय क्षेत्रको मौसम, हिमनदी र हिमतालसम्बन्धी जोखिमका सूचना नियमित रूपमा आदानप्रदान गर्ने व्यवस्थाको पनि प्रशंसा गरिन्। मन्त्री चौधरीले कोप–३१ का निर्णयमा पर्वतीय क्षेत्रका मुद्दालाई प्राथमिकता दिनुपर्ने नेपालको धारणा राख्दै विश्वव्यापी तापक्रम वृद्धिलाई १.५ डिग्री सेल्सियसमा सीमित राख्न र जलवायु अनुकूलनका लागि पर्याप्त वित्त सुनिश्चित गर्नुपर्नेमा जोड दिइन्। उनले नवीकरणीय ऊर्जा, विद्युतीय यातायात र स्वच्छ प्रविधिको विकासमा चीनले हासिल गरेको प्रगतिको प्रशंसा गर्दै जलवायु परिवर्तनका क्षेत्रमा दुई देशबीच सहकार्य विस्तार गर्नुपर्ने बताइन्। सो अवसरमा उनले चिनियाँ मन्त्रीलाई नेपाल भ्रमणको निमन्त्रणासमेत दिएकी थिइन्।