सौराहा अन्तर्राष्ट्रिय तेक्वान्दोमा नेपालको स्वर्णिम सुरुवात

चितवन । प्रथम सौराहा अन्तर्राष्ट्रिय तेक्वान्दो च्याम्पियनसिपमा नेपाली खेलाडीले उत्कृष्ट प्रदर्शन गर्दै स्वर्ण पदक जितेका छन् । प्रतियोगिताअन्तर्गत शनिबार भएको प्रतिस्पर्धामा मधुसुधन सापकोटा, करण धोली, राजन लामा, दीक्षा तामाङसहित नेपाली खेलाडीले विभिन्न विधामा स्वर्ण पदक जित्नुभएको हो । ४९ वर्षमुनिको एकल पुम्सेमा मधुसुधन सापकोटाले स्वर्ण पदक जित्नुभयो । यस स्पर्धामा मोहमद नइम अलीले रजत तथा अष्ट्रेलियाका प्रवीण थापा र मलेसियाका कृष्ण खड्काले कांस्य पदक हात पार्नुभयो । ग्योरोगी सिनियर पुरुष ५४ केजी तौल समूहको फाइनलमा करण धोलीले नेपालकै अंकित सहनीलाई पराजित गर्दै स्वर्ण जित्नुभयो । अंकितले पहिलो खेलमा भारतका असिफ हुसेन र सेमिफाइनलमा बोनका राउतलाई हराउँदै फाइनल यात्रा तय गर्नुभएको थियो । करणले भने बंगलादेशका मोहम्मद साहिन अली र नेपालकै अजय घर्तीलाई पराजित गर्दै उपाधि भिडन्तमा स्थान बनाउनुभएको थियो । यस विधामा अजय घर्ती र रौनक राउतले कांस्य पदक जित्नुभयो । सब जुनियर पुरुष यू-२६ केजीमा आयोजकका साहिल मन्सुरले नेपालका अभिमन्यु गजुरेललाई हराउँदै स्वर्ण जित्नुभयो । भारतका अर्ष सोफियन कुरेस र नेपालका सूर्यान्सजंग न्यौपानेले कांस्य पदक पाउनुभयो । सब जुनियर महिला २५ केजीमा दीपान्सी बायादीले फाइनलमा सार्वाना क्षेत्रीलाई पराजित गर्दै स्वर्ण जित्नुभयो । आत्मिका लिम्बू र चिरागी बस्यालले कांस्यमा चित्त बुझाउनुभयो । सिनियर पुरुष ५८ केजीमा राजन लामाले नेपालकै मोहम्मद हुसेनलाई हराउँदै स्वर्ण जित्नुभयो । यस विधामा कमल खड्का र अन्सुल परियारले कांस्य पदक प्राप्त गर्नुभयो । सब जुनियर पुरुष २८ केजीमा सुप्रिम गुरुङले नेपालकै सलिन अधिकारीलाई फाइनलमा पराजित गर्दै स्वर्ण जित्नुभयो । महिला ४६ केजीमुनि दीक्षा तामाङले नेपालकै रस्मिका गुरुङलाई हराउँदै स्वर्ण पदक जित्नुभयो । यस विधामा प्रकृति मल्ल र अञ्जली चौधरीले कांस्य पदक प्राप्त गर्नुभयो । पुम्सेतर्फ १०–११ वर्षको पुरुष उमेर समूहमा कियानराज कटुवालले स्वर्ण, समर्थ केसीले रजत तथा श्रवण गुरुङ र रयान अर्यालले कांस्य जित्नुभयो । सोही उमेर समूहको महिलातर्फ वितिशा तामाङले स्वर्ण र एरिका न्यौपानेले रजत जित्दा राज्बी श्रेष्ठ र मालाश्री महर्जनले कांस्य पदक हात पार्नुभयो । १४ वर्ष उमेर समूहको पुम्सेमा रेवा काफ्लेले स्वर्ण र मुना थापाले रजत जित्नुभयो । पुरुष १५-१७ वर्ष उमेर समूहमा बिसु राईले स्वर्ण, सचिन विकले रजत तथा अश्विन लामा र शान केसीले कांस्य पदक जित्नुभयो । प्रतियोगितामा नेपालसहित भारत, माल्दिभ्स, मलेसिया, अष्ट्रेलिया, बंगलादेश, सिंगापुर, साउदी अरेबिया र जापानलगायत देशका करिब आठ सय खेलाडी सहभागी छन् । अन्तर्राष्ट्रिय संयोजक अशोक खड्काका अनुसार प्रतियोगितामा कुल ६४ स्वर्ण, ६४ रजत र १२८ कांस्य पदकका लागि प्रतिस्पर्धा भइरहेको छ । प्रतियोगिताको टिम च्याम्पियनले ५० हजार रुपैयाँ, दोस्रो हुने टोलीले ३० हजार र तेस्रो हुने टोलीले २० हजार रुपैयाँ पुरस्कार प्राप्त गर्नेछन् ।