सरकारले नीतिगत स्थिरता र अनुकूल व्यावसायिक वातावरण निर्माण गरोस्, निजी क्षेत्र लगानीका लागि तयार छः महासंघ अध्यक्ष श्रेष्ठ

काठमाडाैँ । नेपाल उद्योग वाणिज्य महासंघका अध्यक्ष अञ्जन श्रेष्ठले निजी क्षेत्र लगानीका लागि तयार रहेको भन्दै त्यसका लागि सरकारले नीतिगत स्थिरता, लगानीको सुरक्षा र अनुकूल व्यावसायिक वातावरण निर्माण गर्नुपर्ने बताएका छन् । काठमाडौँमा नेपाल अन्तर्राष्ट्रिय व्यापार मेलाबारे जानकारी दिन आयोजित पत्रकार सम्मेलनमा अध्यक्ष श्रेष्ठले मुलुकको आर्थिक पुनरुत्थानका लागि सरकारले पूर्वाधार क्षेत्रमा लगानी बढाउन आवश्यक रहेको समेत बताए । बजारमा उत्पादनको माग घट्दै गएको र मुद्रा प्रवाहसमेत कमजोर हुँदा उद्योगी व्यवसायी प्रभावित भएको उनको भनाइ छ । उनले बढ्दो युवा पलायनका कारण आन्तरिक बजारमा वस्तु तथा सेवाको माग घटिरहेको उल्लेख गर्दै बजारमा माग बढाउने वातावरण निर्माण गर्न समेत सरकारको ध्यानाकर्षण गराए । उनले पछिल्लो समय पूर्वाधार क्षेत्रमा राज्यको लगानी र खर्च अपेक्षाकृत रूपमा बढ्न नसकेको समेत उल्लेख गरे । पूर्वाधारमा सरकारी लगानी बढे मात्रै बजारमा मुद्रा प्रवाह र माग विस्तारमा सहयोग पुग्ने उनको भनाइ छ । अध्यक्ष श्रेष्ठले उत्पादन, निर्यात, रोजगारी र लगानी विस्तारमा निजी क्षेत्रको भुमिका प्रभावकारी बनाउन महासंघले छिमेकी मुलुकहरूसँग पनि छलफल अघि बढाएको बताए । संयुक्त व्यापार मञ्च (जोइन्ट बिजनेस फोरम) गठन गरी नेपालबाट छिमेकी मुलुकमा निर्यात गर्न सकिने वस्तु तथा ती मुलुकबाट नेपालमा आयात गर्न सकिने उत्पादन पहिचान गर्ने काममा महासंघ क्रियाशील रहेको अध्यक्ष श्रेष्ठले बताए ।महासंघले मुलुकमा व्यापार विस्तार, लगानी आकर्षण, निर्यात प्रवद्र्धन र व्यवसायिक सम्बन्ध विस्तार गर्ने उद्देश्यले अगामी १७ देखि २१ मंसिरसम्म नेपाल अन्तर्राष्ट्रिय व्यापार मेला आयोजना गर्दैछ ।