विपद्का बाबजुद लक्ष्मीपूजाको विद्युत् माग व्यवस्थापन, भारततर्फ ५८७ मेगावाट निर्यात

काठमाडौं। प्राकृतिक विपद्का कारण विद्युत् उत्पादन र प्रसारण प्रणालीमा क्षति पुगे पनि नेपाल विद्युत् प्राधिकरणले यस वर्षको लक्ष्मीपूजाको विद्युत् माग सफलतापूर्वक व्यवस्थापन गरेको छ। विपद्का कारण रसुवा क्षेत्रमा ४५० मेगावाट विद्युत् उत्पादन प्रणालीबाट बाहिर रहे पनि प्राधिकरणले माग व्यवस्थापन गर्न सफल भएको हो। प्राधिकरणका अनुसार आइतबार साँझ ६ बजेर १५ मिनेटमा राष्ट्रिय प्रणालीको उच्चतम माग १ हजार ८१३ मेगावाट पुगेको थियो। सो समयमा कुल प्रणालीको पिक भार २ हजार ४००.३० मेगावाट रहेको थियो। आन्तरिक माग पूरा गरेर प्राधिकरणले भारततर्फ ५८७.३० मेगावाट विद्युत् निर्यात गरेको छ। यस वर्षको लक्ष्मीपूजाको उच्चतम माग गत वर्षको तुलनामा ६८ मेगावाट बढी हो। गत वर्षको लक्ष्मीपूजाको उच्चतम माग १ हजार ७४५ मेगावाट थियो। त्यस्तै, यस वर्ष काठमाडौं उपत्यकाको विद्युत् माग ४८९ मेगावाट पुगेको छ, जुन गत वर्ष ४०२ मेगावाट थियो। प्राधिकरणका कार्यकारी निर्देशक दीर्घायुकुमार श्रेष्ठले विद्युत् प्रणालीलाई अविच्छिन्न राख्न देशभर प्राविधिक टोली र आवश्यक उपकरण तयारी अवस्थामा राखिएको बताए। कुनै समस्या देखिए १५ मिनेटभित्र समाधान गर्ने गरी टोली परिचालन गरिएको थियो। ऊर्जा, जलस्रोत तथा सिँचाइमन्त्री विराजभक्त श्रेष्ठले चुनौतीपूर्ण परिस्थितिमा पनि माग व्यवस्थापन गर्न सफल भएकोमा प्राधिकरणका कर्मचारी र व्यवस्थापनलाई धन्यवाद दिएका छन्। मन्त्री श्रेष्ठले आइतबार साँझ भार प्रेषण केन्द्र पुगेर विद्युत् माग र आपूर्तिको अवस्थाबारे जानकारी लिएका थिए। प्राधिकरणको तथ्यांकअनुसार यस वर्ष स्वतन्त्र ऊर्जा उत्पादकबाट १ हजार ५३६.५० मेगावाट, प्राधिकरणका सहायक कम्पनीबाट ४९९.२० मेगावाट, नदी प्रवाही तथा अर्धजलाशययुक्त आयोजनाबाट ३४२.३० मेगावाट र जलाशययुक्त आयोजनाबाट २२.३० मेगावाट विद्युत् प्रणालीमा उपलब्ध थियो।