युरोपका विमानस्थलमा बमको धम्की, सुरक्षा सतर्कता बढाइयो

काठमाडौं। युरोपका विभिन्न देशका विमानस्थल र हवाई उडानलाई लक्षित गरी लगातार आइरहेका बमको धम्कीले उड्डयन क्षेत्र प्रभावित बनेको छ। बिहीबार मात्रै कम्तीमा २१ वटा विमान र विभिन्न विमानस्थलमा बम विस्फोट गराउने धम्की आएपछि कैयौँ उडानको मार्ग परिवर्तन गरिएको छ। बीबीसीका अनुसार इटालीमा एउटा विमानलाई सुरक्षा प्रदान गर्न लडाकु विमानसमेत परिचालन गरिएको थियो। लन्डनको हिथ्रो विमानस्थलमा आएको धम्कीबाहेक अन्य घटनालाई गम्भीर रूपमा लिइएको थियो, यद्यपि सबै धम्की झुटा साबित भएका छन्। यस्ता घटना समन्वयात्मक रूपमा हुन थालेपछि रुसको संलग्नता हुन सक्ने आशंका गरिएको छ। यसअघि युरोपमा भएका साइबर आक्रमण, शंकास्पद ड्रोन गतिविधि र पूर्वाधारमाथिका प्रहारलाई पश्चिमा देशले ‘हाइब्रिड वारफेयर’ वा मिश्रित युद्धको रणनीतिका रूपमा व्याख्या गर्दै आएका छन्। यद्यपि, बिहीबारको घटनामा रुस, इरान वा उनीहरूको नियन्त्रणमा रहेका कुनै समूहको संलग्नता पुष्टि गर्ने ठोस प्रमाण अहिलेसम्म फेला परेको छैन। रोमका विमानस्थल अधिकारीहरूलाई पठाइएको एउटा इमेलमा ‘फाइटर्स अफ द मेल स्टेट’ नामक समूहको नाम उल्लेख छ। उक्त नाम रुसको अतिवादी समूह ‘मुज्स्कोई लिजन’ सँग सम्बन्धित हुन सक्ने अनुमान गरिएको छ। यद्यपि, यो समूहले नै धम्की दिएको हो वा कसैले नामको दुरुपयोग गरेको हो भन्ने स्पष्ट हुन सकेको छैन। युक्रेनलाई नेटोले गरिरहेको सहयोग र रुसी सैन्य रणनीतिमा पुगिरहेको अवरोधका कारण मस्को पश्चिमा देशहरूसँग असन्तुष्ट रहँदै आएको छ। यस्ता गतिविधि प्रायः गोप्य रूपमा हुने र जिम्मेवारी अस्वीकार गर्न सकिने भएकाले प्रमाण जुटाउन सुरक्षा निकायलाई कठिन भइरहेको छ। हाल युरोपका प्रहरी र सम्बन्धित मन्त्रालयहरू धम्कीको स्रोत पहिचान गर्न र आगामी दिनमा हुन सक्ने जोखिम न्यूनीकरण गर्न सक्रिय छन्।