सुर्खेत । मुगुमा पिकअप भ्यान दुर्घटनामा परी गम्भीर घाइते भएका दुई जनालाई थप उपचारका लागि हेलिकप्टरबाट उद्धार गर्न जिल्ला प्रशासन कार्यालयले गृह मन्त्रालयसँग माग गरेको छ। आइतबार दिउँसो करिब ४ बजे छायाँनाथ रारा नगरपालिका ७ स्थित जिरो प्वाइन्ट नजिक पिकअप भ्यान दुर्घटनामा परेको थियो। सुर्खेतबाट रारातर्फ जाँदै गरेको बा.१ ज.प. १८६४ नम्बरको भ्यान रारा जाने कच्ची सडकखण्डबाट करिब ६ सय मिटर तल खसेको जिल्ला प्रशासन कार्यालय मुगुले जनाएको छ। दुर्घटनामा तीन जनाको मृत्यु भएको र दुई जना गम्भीर घाइते भएका छन्। घाइतेको मुगु जिल्ला अस्पतालमा उपचार भइरहेको थियो। स्वास्थ्य अवस्था गम्भीर रहेकाले थप उपचारका लागि ललितपुरस्थित बी एन्ड बी अस्पताल रेफर गरिएको जिल्ला प्रशासन कार्यालयले गृह मन्त्रालयलाई पठाएको पत्रमा उल्लेख छ। प्रमुख जिल्ला अधिकारी पवनकुमार भण्डारीले घाइतेको उद्धारका लागि नेपाली सेनाको हेलिकप्टर वा जहाजको व्यवस्था मिलाइदिन गृह मन्त्रालयलाई अनुरोध गरेका छन्। उक्त दुर्घटनामा मृत्यु हुनेमा काठमाडौं कलंकीका ५० वर्षीय विजय बस्नेत, ५४ वर्षीय रमेश बिडारी र ५० वर्षीय पूर्णकुमार थापा रहेका जिल्ला प्रहरी कार्यालय मुगुका प्रमुख तथा प्रहरी नायब उपरीक्षक रवीराज थपलियाले जानकारी दिए । उनका अनुसार ललितपुर महानगरपालिका–१५ का ५८ वर्षीय चालक कञ्चन थापा र सोही ठाउँकी ५४ वर्षीया अञ्जु थापा घाइते छन् । उनीहरूको अवस्था मध्यम रहेको प्रहरीले जनाएको छ ।
मुगु दुर्घटनाका तीन जनाको मृत्यु, दुई घाइतेलाई हेलिकप्टरबाट उद्धार गर्न माग

Read Complete Original Article
Published originally on केन्द्रबिन्दु






