मुगु । मुगुको छायाँनाथ रारा नगरपालिका–७, टोप्लास्थित ताल्चा–रारा कच्ची सडकखण्डमा जिप दुर्घटना हुँदा तीन जनाको मृत्यु भएको छ भने दुई जना घाइते भएका छन् । आइतबार साँझ करिब ४ः४५ बजे काठमाडौंबाट रारातर्फ जाँदै गरेको बा १७ च १८६४ नम्बरको जिप सडकबाट करिब ६ सय मिटर तल खसेर दुर्घटना भएको हो । दुर्घटनामा परी काठमाडौंको कलंकी निवासी ५० वर्षीय विजय बस्नेत, ५४ वर्षीय रमेश बिडारी र ५० वर्षीय पूर्णकुमार थापाको मृत्यु भएको प्रहरीले जनाएको छ । दुर्घटनापछि उद्धार गरी जिल्ला अस्पताल मुगु पुर्याइएका उनीहरूलाई चिकित्सकले मृत घोषणा गरेका थिए । दुर्घटनामा जिप चालक ललितपुर महानगरपालिका–१५ निवासी ५८ वर्षीय कञ्चन थापा र सोही स्थानकी ५४ वर्षीया अञ्जु थापा घाइते भएका छन् । दुवै जनाको अवस्था मध्यम रहेको र जिल्ला अस्पताल मुगुमा उपचार भइरहेको प्रहरीले जनाएको छ । दुर्घटनाको सूचना प्राप्त हुनासाथ जिल्ला प्रहरी कार्यालय मुगुबाट प्रहरी नायब उपरीक्षक रविराज थपलियाको कमान्डमा १० जना र ताल्चास्थित प्रहरी सुरक्षा गार्डबाट प्रहरी नायब निरीक्षक डम्बरबहादुर अधिकारीको कमान्डमा सात जना गरी १७ जनाको प्रहरी टोली घटनास्थलमा खटिएको थियो । प्रहरी टोलीले घटनास्थलबाट मृतक तथा घाइतेहरूको उद्धार गरी जिल्ला अस्पताल पुर्याएको थियो । उक्त जिपमा चालकसहित पाँच जना सवार रहेको प्रहरीले जनाएको छ । दुर्घटनाको कारण खुल्न सकेको छैन । चालकले मादक पदार्थ सेवन गरे वा नगरेको लगायतका विषयमा प्रहरीले अनुसन्धान गरिरहेको जनाएको छ ।
मुगुमा जिप दुर्घटना हुँदा तीन जनाको मृत्यु, दुई घाइते
Read Complete Original Article
Published originally on हिमालय टाइम्स
