मुक्तिनाथबाट सुरु भएको दिव्य रथयात्रालाई विराटनगरमा भव्य स्वागत

विराटनगर । मुस्ताङस्थित मुक्तिनाथ धामबाट सुरु भएको मुक्तिनाथ गजेन्द्र नारायण दिव्य रथयात्रा महोत्सवलाई विराटनगरमा भव्य स्वागत गरिएको छ । विश्वभरका वैदिक सनातन धर्मावलम्बीहरूको आस्थाको केन्द्र मुक्तिनाथ धाम तथा कालीगण्डकी तटीय क्षेत्रका पवित्र तीर्थस्थलहरूको प्रचारप्रसार र धार्मिक पर्यटन प्रवर्द्धन गर्ने उद्देश्यले रथयात्रा आयोजना गरिएको हो । विराटनगरमा लक्ष्मीनारायण मन्दिरका स्वामी अच्युत स्वामीको प्रमुख आयोजनामा तथा कोशी प्रदेशसभा सदस्य एवं कांग्रेस नेता भीम पराजुलीको संयोजकत्वमा गठित समितिले रथयात्राको स्वागत तथा व्यवस्थापन गरेको थियो । रथयात्राको स्वागत कार्यक्रममा मोरङका प्रमुख जिल्ला अधिकारी युवराज कट्टेल, धार्मिक अभियन्ता एवं समितिकी उपाध्यक्ष पुष्पलता कोइराला, सचिव कैलाश भट्टराई, सदस्यहरू भीखमचन्द सरल, बेनीगोपाल मुन्दडा र जुगलकिशोर राठीसहित विभिन्न सुरक्षा निकायका प्रमुख तथा धार्मिक र सामाजिक अभियन्ताहरूको सहभागिता रहेको थियो । सोमबार विराटनगर आइपुगेको रथले मंगलबार विराटनगरस्थित भेडियारीमा रहेको ऐतिहासिक विराट राजाको दरबारका संरक्षित भग्नावशेषको परिक्रमा गरेको थियो । त्यसपछि धरान रोड हुँदै रथयात्रा सुनसरीतर्फ प्रस्थान गरेको छ । कार्यक्रममा बोल्दै रथयात्रा व्यवस्थापन समितिका संयोजक पराजुलीले शक्तिका साधकहरूका लागि विशेष महत्त्व राख्ने रथ विराटनगर आइपुग्नु गौरव र सौभाग्यको विषय भएको बताए । मुक्तिनाथ पीठाधीश्वर कमलनयनाचार्यका उत्तराधिकारी करपात्री स्वामीजीले रथयात्रा सम्पन्न भएपछि नवलपरासीको त्रिवेणीस्थित श्री गजेन्द्र नारायण दिव्यधाममा भगवान् श्री गजेन्द्रमोक्ष नारायणको दिव्य विराट महायज्ञ आयोजना गरिने जानकारी दिएका छन् ।