काठमाडौं । नेकपा एमालेका सचिव महेश बस्नेतले वर्तमान सरकारलाई आगामी नयाँ वर्षसम्म टिक्न दिन नहुने बताएका छन् । एमाले बागमती प्रदेश संगठन कमिटीको बैठकलाई सम्बोधन गर्दै बस्नेतले सरकारको आयु लामो नरहने दाबी गरेका हुन् । उनले वर्तमान सरकारलाई हटाउन एमालेले अन्य राजनीतिक दलसँग आवश्यकताअनुसार सहकार्य गर्दै आन्दोलनलाई व्यवस्थित बनाउने बताए । उनले भने, ‘भ्रममा बाँचेको, देशलाई जलाएर आएको, खरानी ग्याङ भनेर युवाहरूले उपमा दिएको, सहकारी ठगी लगायतका आपराधिक कर्ममा संलग्न पार्टी र त्यसका नेताहरू रहेको वर्तमान सरकारको आयु धेरै लामो रहने छैन । यो सरकारलाई आउँदो नयाँ वर्ष देखाउन दिनु हुँदैन ।’ बस्नेतले एमालेले आफ्नो संगठनलाई मजबुत बनाउँदै स्थानीय कमिटीहरू परिचालन गर्ने र स्थानीय तह तथा प्रदेश निर्वाचनको तयारीलाई व्यवस्थित बनाउने पनि बताए । यसैगरी, वर्तमान सरकारको नौमहिने कार्यकाललाई बालेनको असफल कार्यकालको संज्ञा दिँदै बस्नेतले सरकार अधिनायकवाद, निरंकुशता र प्रतिशोधको बाटोमा अघि बढेको आरोपसमेत लगाए । उनले भने, ‘यो नौमहिने कार्यकाल बालेनको असफल कार्यकाल हो । यो अधिनायकवादतर्फको यात्रा हो, निरंकुशतातर्फको यात्रा हो र प्रतिशोधतर्फको यात्रा हो ।’
महेश बस्नेतको टिप्पणी- ‘यो सरकारलाई नयाँ वर्ष देख्न दिनुहुँदैन’
Read Complete Original Article
Published originally on केन्द्रबिन्दु
