भारतीय सेनाको अग्निवीरको कार्यकाल दुई वर्ष थप

नयाँदिल्ली । भारतीय सेनाको अग्निपथ योजनाअन्तर्गत भर्ना भएका अग्निवीरहरूका लागि दुईवर्षको दोस्रो कार्यकाललाई भारतको केन्द्रीय मन्त्रिपरिषद्ले स्वीकृति दिएको छ । भारतका रक्षामन्त्री राजनाथ सिंहले सामाजिक सञ्जाल एक्समार्फत यसबारे जानकारी दिएका हुन् । उनले प्रधानमन्त्री नरेन्द्र मोदीको अध्यक्षतामा बसेको मन्त्रिपरिषद् बैठकले अग्निपथ योजनाअन्तर्गत अग्निविरहरूका लागि दुई वर्षको दोस्रो कार्यकाल (सेकेन्ड टुर अफ ड्युटी) स्वीकृत गरेको बताएका छन् । निर्णयअनुसार, निर्धारित छनोट मापदण्ड पूरा गर्ने र इच्छुक अग्निवीरहरूले चार वा ६ वर्षको प्रारम्भिक कार्यकाल पूरा गरेपछि थप दुईवर्ष सेवा गर्न पाउनेछन् । त्यसपछि नियमित सैनिकका रूपमा भर्ना हुने व्यवस्था पनि गरिएको रक्षामन्त्री सिंहले बताएका छन् । यो निर्णय भारतीय रक्षा फौजको दीर्घकालीन संरचनात्मक सुधारको निरन्तरता भएको उनको भनाइ छ । यसको उद्देश्य युवा, तन्दुरुस्त, प्राविधिक रूपमा सुसज्जित र भविष्यका चुनौती सामना गर्न तयार सैन्य बल निर्माण गर्नु रहेको उनले उल्लेख गरेका छन् । युद्धको बदलिँदो स्वरूपअनुसार भारतीय सेनालाई तयार पार्ने उद्देश्यले यो कदम चालिएको पनि सिंहले बताएका छन् । भारत सरकारले यो निर्णय गरेको समयमा भारतीय विदेश सचिव विक्रम मिश्री नेपालको दुईदिने भ्रमणमा छन् । दशकौँदेखि नेपालले आफ्ना नागरिकलाई एक विशेष सम्झौताअन्तर्गत गोर्खा सैनिकका रूपमा भारतीय सेनामा भर्ती हुन अनुमति दिँदै आएको थियो । भारतले विवादास्पद अग्निपथ योजना नाको नयाँ सैनिक भर्ती योजना ल्याएपछि त्यस्तो सैन्य भर्ती प्रक्रिया रोकिएको छ । भारतको पछिल्लो निर्णयसँगै विदेश सचिव मिश्रीको नेपाल भ्रमणका क्रममा यस विषयमा पनि नेपाल सरकारका अधिकारीहरूसँग छलफल हुन सक्ने बारे स्पष्ट छैन । तर भारतले लामो समयदेखि नेपाली नागरिकलाई अग्निपथ योजनामा सहभागी गराउन पहल गर्दै आएको छ । एएनआई