भारतीय विदेश सचिव मिस्रीद्वारा प्रधानमन्त्रीको भारत भ्रमणका एजेन्डाबारे छलफल

काठमाडौं। भारतीय विदेश सचिव विक्रम मिस्रीले प्रधानमन्त्री बालेन्द्र शाहको आसन्न भारत भ्रमणको तयारीका लागि काठमाडौंमा प्रारम्भिक छलफल गरेका छन्। मिस्रीले आफ्ना नेपाली समकक्षी परराष्ट्र सचिव अमृत बहादुर राईसँग द्विपक्षीय वार्ता सुरु गरेपछि नेपालका विभिन्न मन्त्रीहरूसँग भेटघाट गरेका हुन्। प्रधानमन्त्री शाहको भारत भ्रमण आगामी मंसिर ६ देखि ८ गतेसम्म हुने गरी दुवै मुलुकले तयारी गरिरहेका छन्, यद्यपि भ्रमणको मिति औपचारिक रूपमा घोषणा हुन बाँकी छ। मिस्रीले परराष्ट्रमन्त्री शिशिर खनाल, अर्थमन्त्री स्वर्णिम वाग्ले र ऊर्जामन्त्री विराजभक्त श्रेष्ठसँग छुट्टाछुट्टै भेटवार्ता गरेका छन्। अर्थमन्त्री वाग्लेसँगको भेटमा दुई देशबीचको आर्थिक सहकार्यका विविध विषयमा छलफल भएको थियो। यसैगरी, ऊर्जामन्त्री श्रेष्ठले भारतसँग विद्युत् व्यापार विस्तार, निर्माणाधीन जलविद्युत् आयोजनाहरूको समयमै सम्पन्न गर्ने र निजी क्षेत्रको लगानी बढाउने विषयमा आग्रह गरेका छन्। पञ्चेश्वर बहुउद्देश्यीय आयोजना, अरुण तेस्रो, तल्लो अरुण र फुकोट कर्णाली जलविद्युत आयोजनाको प्रगतिका बारेमा पनि छलफल भएको छ। मन्त्री श्रेष्ठले नेपालबाट भारततर्फको विद्युत् निर्यातको सीमा बढाउन र विपद् व्यवस्थापनमा भारतको सहयोगका लागि धन्यवाद दिएका छन्। परराष्ट्रमन्त्री खनालसँगको भेटमा नेपाल-भारतबीचको ऐतिहासिक मित्रता र बहुआयामिक साझेदारी सुदृढ गर्ने विषयमा विचारविमर्श भएको छ। यसका साथै ऊर्जा, हवाई रुट, व्यापार, खेलकुद र शिक्षा क्षेत्रमा सहकार्य गर्ने विषयमा पनि छलफल भएको परराष्ट्र मन्त्रालयले जनाएको छ। नेपालले लामो समयदेखि पोखरा र गौतमबुद्ध अन्तर्राष्ट्रिय विमानस्थलका लागि नयाँ हवाई मार्ग उपलब्ध गराउन भारतलाई अनुरोध गर्दै आएको छ। भारतीय विदेश सचिव मिस्रीले आफ्नो भ्रमणका क्रममा प्रधानमन्त्री शाह र राष्ट्रिय स्वतन्त्र पार्टीका सभापति रवि लामिछानेसँग पनि भेटवार्ता गर्ने कार्यक्रम छ। मिस्री भारत फर्किएपछि दुवै देशले प्रधानमन्त्रीको भ्रमणको मिति औपचारिक रूपमा घोषणा गर्ने बताइएको छ।