भन्सार छली ल्याइएका १६ लाखभन्दा बढीका अवैध सामान बरामद

वीरगञ्ज (पर्सा) । सशस्त्र प्रहरी बल, नेपालले पर्साका विभिन्न स्थानबाट भन्सार छली ल्याइएका १६ लाख रुपैयाँभन्दा बढी मूल्यका अवैध सामान बरामद गरेको छ । सशस्त्र प्रहरी बल, नेपाल नं. १३ गण हेडक्वार्टर पर्सा तथा मातहतका कार्यालयबाट खटिएका टोलीले भारतबाट अवैध रूपमा भन्सार छली विभिन्न सवारीसाधनमा लोड गरी नेपाल भित्र्याउँदै गरेका सामान बरामद गरेका हुन् । बरामद सामानमध्ये भन्सार कार्यालयमा बुझाइएका सामान वीरगञ्ज भन्सार कार्यालयमा दाखिला गरिएको छ भने घरेलु मदिरा आवश्यक प्रक्रिया पूरा गरी नष्ट गरिएको सशस्त्र प्रहरी नायब उपरीक्षक सुरज क्षेत्रीले बताए । सशस्त्र प्रहरीले एक लाख ४३ हजार ४५१ रुपैयाँ बराबरका भिटामिन औषधि बरामद गरेको छ । त्यस्तै, बिन्दवासिनी गाउँपालिका–३ झौवागुठीस्थित बीओपी अमरपट्टीबाट खटिएको टोलीले भारतबाट भन्सार छली ल्याउँदै गरेको एक लाख १० हजार रुपैयाँ बराबरका कपडा बरामद गरी वीरगञ्ज भन्सार कार्यालयमा बुझाएको छ । यसैगरी, पर्सा र बाराको सीमाक्षेत्रनजिकै रहेको एक छाप्रोमा भन्सार छली ल्याइएका कपडा लुकाइछिपाइ राखिएको विशेष सूचना पाएपछि सशस्त्र प्रहरीका दुवै जिल्लाका गणबाट खटिएको संयुक्त टोलीले खानतलासी गरेको थियो । सो क्रममा नौ लाख ७० हजार रुपैयाँ बराबरका कपडा बरामद गरी भन्सार कार्यालयमा बुझाइएको प्रहरीले जनाएको छ । त्यस्तै, मातहतका कार्यालयबाट खटिएका टोलीले विभिन्न स्थानबाट चार लाख पाँच हजार ५९० रुपैयाँ बराबरका मोटरसाइकल, औषधि, तरकारी, जुत्ता, अगरबत्ती, नरिवललगायत सामान बरामद गरी वीरगञ्ज भन्सार कार्यालयमा बुझाएका छन् । यस्तै, बीओपी प्रसौनीभाठ्ठाबाट खटिएको टोलीले नेपालबाट भारततर्फ अवैध रूपमा लैजाँदै गरेको १२ हजार रुपैयाँ बराबरको ६० लिटर घरेलु मदिरासमेत बरामद गरेको छ । उक्त मदिरा आवश्यक प्रक्रिया पूरा गरी नष्ट गरिएको सशस्त्र प्रहरीले जनाएको छ ।