काठमाडौं । बलिउड अभिनेता अमिताभ बच्चनले आफ्नो घरमा बम विस्फोट गराउने धम्की पाएपछि पहिलोपटक समर्थकसँग भेट गरेका छन् । तर, यसपटक उनको नियमित आइतबारको भेटघाट भने निकै फरक देखियो । मुम्बईस्थित आफ्नो निवास ‘जलसा’ बाहिर हरेक आइतबार समर्थकलाई अभिवादन गर्दै आएका अमिताभ यसपटक कडा सुरक्षा घेराभित्र देखिए । सम्भावित जोखिमलाई मध्यनजर गर्दै उनलाई पारदर्शी बुलेटप्रुफ सिसाभित्र राखेर समर्थकसँग भेट गराइएको थियो । आइतबार सधैँझैँ घरबाहिर निस्किएका उनले बुलेटप्रुफ सिसाभित्रैबाट हात जोड्दै र हात हल्लाउँदै प्रशंसकको अभिवादन स्वीकार गरे । उक्त अवसरमा उनका छोरा अभिषेक बच्चन पनि सँगै थिए । सार्वजनिक भएका तस्बिर तथा भिडियोमा अभिषेक बुबाको पछाडि उभिएर वरपरको गतिविधि र समर्थकको भीडलाई सतर्कतापूर्वक नियालिरहेको देखिन्छ । बम विस्फोटको धम्कीपछि अमिताभको सुरक्षामा विशेष सतर्कता अपनाइएको छ । जलसाबाहिर सुरक्षाकर्मीको बाक्लो उपस्थिति रहेको थियो । सुरक्षामा कडाइ गरिए पनि अमिताभले वर्षौंदेखि कायम राख्दै आएको आइतबार समर्थकसँग भेट गर्ने परम्परालाई भने निरन्तरता दिएका छन् । जोखिमका बीच पनि प्रशंसकलाई अभिवादन गर्न पुगेका उनको यसपटकको उपस्थितिले समर्थकसँगको सम्बन्धलाई दिएको महत्त्व झल्काएको छ ।
बमको धम्कीपछि बुलेटप्रुफ सिसाभित्रैबाट समर्थकलाई भेटे अमिताभले
Read Complete Original Article
Published originally on केन्द्रबिन्दु
