बक्स अफिसमा ‘कबड्डी ५’को दबदबा

काठमाडौं । यस पालीको बडादशैँको अवसरमा प्रदर्शनमा आएका चार नेपाली चलचित्रमध्ये ‘कबड्डी ५’ले बक्स अफिसमा बलियो पकड जमाएको छ । प्रदर्शनको दश दिनमै फिल्मले साढे १० करोड रुपैयाँभन्दा बढी ग्रस व्यापार गर्दै दशैँका चलचित्रलाई उछिनेको छ । यससँगै ‘कबड्डी ५’ यसवर्ष सर्वाधिक कमाइ गर्ने नेपाली चलचित्रको सूचीमा दोस्रो स्थानमा उक्लिएको छ । चलचित्र विकास बोर्डले सोमबार सार्वजनिक गरेको बक्स अफिस विवरण अनुसार कात्तिक ६ गतेदेखि प्रदर्शनमा आएको यो चलचित्रले कात्तिक १५ गतेसम्म १० करोड ७६ लाख ७३ हजार ७१५ रुपैयाँ ग्रस कमाइ गरेको छ । यस अवधिमा चलचित्रका तीन लाख ४६ हजार ४२७ वटा टिकट बिक्री भएका छन् । ‘कबड्डी ५’ले यसअघि दोस्रो स्थानमा रहेको ‘पेन्सन पट्टा’लाई समेत पछि पारेको छ । ‘पेन्सन पट्टा’ले आइतबारसम्म १० करोड २८ लाख १८ हजार ४८८ रुपैयाँ ग्रस व्यापार गरेको छ । संयोग के छ भने यी दुवै चलचित्रमा अभिनेता दयाहाङ राई मुख्य भूमिकामा हुनुहुन्छ । दयाहाङ अभिनीत दुई चलचित्रले नै यस वर्षको बक्स अफिसमा उल्लेख्य सफलता हासिल गरेका छन् । दशैँमा प्रदर्शनमा आएका चलचित्रमध्ये ‘कबड्डी ५’पछि ‘आ बाट आमा २’ दोस्रो स्थानमा छ । चलचित्रले आइतबारसम्म ६ करोड २४ लाख ७० हजार १३० रुपैयाँ ग्रस व्यापार गरेको छ । यसका दुई लाख १३ हजार १९४ वटा टिकट बिक्री भएका छन् । त्यस्तै, ‘छ माया छपक्कै २’ले तीन करोड ३४ लाख ८४ हजार ४३५ रुपैयाँ ग्रस कमाइ गर्दै तेस्रो स्थान हासिल गरेको छ । विराज भट्ट निर्देशित एक्सन फिल्म ‘१२ गाउँ २’ भने अपेक्षाकृत कमजोर देखिएको छ । यस चलचित्रले ७४ हजार ८०३ वटा टिकट बिक्रीबाट दुई करोड २९ लाख ५७ हजार ९८६ रुपैयाँ ग्रस व्यापार गरेको छ । पहिलो भागले घरेलु बक्स अफिसमा झण्डै २० करोड रुपैयाँ कमाएको ‘१२ गाउँ’को सिक्वेलको व्यापार भने निराशाजनक देखिएको छ । उपलब्ध तथ्यांकका आधारमा यसलाई यस वर्षका कमजोर व्यापार गर्ने चलचित्रमध्ये एकका रूपमा हेरिएको छ । यसैबीच, चलचित्र विकास बोर्डले ‘गौँथली’ र ‘बाः एक योद्धा’को कमाइ विवरण पनि सार्वजनिक गरेको छ । बोर्डका अनुसार ‘गौँथली’ले २६ करोड सात लाख ४६ हजार १८६ रुपैयाँ ग्रस व्यापार गरेको छ । चलचित्रका नौ लाख ४६ हजार ८३४ वटा टिकट बिक्री भएका छन् । योसँगै ‘गौँथली’ यस वर्ष सर्वाधिक कमाइ गर्ने नेपाली चलचित्र बनेको छ । त्यस्तै, चलचित्र ‘बाः एक योद्धा’ले तीन करोड ५४ लाख ४० हजार २५६ रुपैयाँ ग्रस व्यापार गरेको बोर्डको विवरणमा उल्लेख छ । समग्रमा यस वर्षको नेपाली बक्स अफिसमा ‘गौँथली’को अग्रता कायम रहँदा ‘कबड्डी ५’ले पनि छोटो समयमै उल्लेख्य व्यापार गर्दै आफ्नो स्थान बलियो बनाएको छ । दसैँमा प्रदर्शनमा आएका चलचित्रमध्ये ‘कबड्ढी ५’को व्यापारिक सफलताले नेपाली चलचित्र बजारमा दर्शकको आकर्षण र स्टार कलाकारको प्रभावलाई पुनः चर्चामा ल्याएको छ ।