बंगालको खाडीमा चक्रवात बन्दै, नेपालमा भने असर नपर्ने मौसमविद्को भनाइ

नेपाल मौसम विज्ञान विभागका मौसमविद् डेभिड ढकालले बंगालको खाडीमा विकसित भइरहेको न्यूनचापीय प्रणालीले नेपालमा प्रभाव नपार्ने बताएका छन् । उनले बंगालको खाडीमा विकसित न्यूनचापीय क्षेत्र गहिरो न्यूनचापीय प्रणालीमा परिणत हुँदै चक्रवात बन्ने दिशामा अघि बढिरहेको भए पनि त्यसले नेपालमा असर नगर्ने बताए । हालसम्मको मौसमी विश्लेषणअनुसार उक्त प्रणालीले नेपालको मौसममा उल्लेखनीय प्रभाव पार्ने सम्भावना नरहेको उनले जानकारी दिए । विभागले प्रणालीको अवस्था, सम्भावित मार्ग र दिशाबारे निरन्तर अनुगमन गरिरहेको उनको भनाइ छ । ‘बङ्गालको खाडीमा जुन न्युन चापीय क्षेत्र छ, त्यो गहिरो न्युनचापीय क्षेत्रमा परिणत भएको जस्तो देखिन्छ । यसले बिस्तारै चक्रवातको अवस्था लिने जस्तो देखिन्छ । तथापि यो चक्रवात बने पनि यसले नेपालमा प्रभाव पार्ने जस्तो देखिँदैन । यसले नेपालमा मौसमको फेरबदल बनाउने, वर्षाको गतिविधि बढाउने जस्तो देखिँदैन,’ ढकालले भने । प्रणालीको मार्गमा परिवर्तन आएर नेपालमा प्रभाव पर्ने अवस्था देखिए विभागले आवश्यक जानकारी गराउने उनले बताए । ‘यो प्रणालीको नेपाल मौसम विज्ञान विभागले यसको अवलोकन गरिरहेको छ । यसले कसरी चाहीँ ट्रयाक लिन्छ ? यो कता जान्छ भन्ने किसिमको विश्लेषण भईरहेको छ । यदि फेरबदल आउने भयो भने चाहिँ हामी जानकारी गराउने छौँ । अहिलेसम्मको प्रक्षेपण अनुसार यसले खासै नेपालको मौसममा प्रभाव पार्ने जस्तो देखिँदैन,’ उनले भने । यसैबीच, आइतबार मुख्यतः हिमाली तथा पहाडी भूभागका केही स्थानमा हल्का वर्षा र हिमपातको सम्भावना रहेको मौसमविद् ढकालले बताए । पश्चिमी न्यूनचापीय प्रणालीको प्रभावले कर्णाली र सुदूरपश्चिम प्रदेशका हिमाली तथा पहाडी भूभागका धेरै स्थानमा वर्षा र हिमपात हुनसक्ने भए पनि भारी वर्षाको सम्भावना नरहेको उनको भनाइ छ । त्यस्तै, गण्डकी र कोशी प्रदेशका हिमाली तथा पहाडी भूभागका थोरै स्थानमा र लुम्बिनी प्रदेशका केही स्थानमा पनि वर्षाको सम्भावना रहेको छ । बागमती प्रदेशका हिमाली तथा पहाडी भूभागका एक–दुई स्थानमा मात्रै वर्षा हुनसक्ने विभागको अनुमान छ । आइतबार बेलुकादेखि पश्चिमी न्यूनचापीय प्रणाली कमजोर हुँदै जाने र वर्षाका गतिविधि क्रमशः घट्ने उनले जानकारी दिए । आगामी दुई दिन वर्षाका गतिविधि न्यून रहने र त्यसपछिका पाँच दिनसम्म पनि वर्षाको सम्भावना क्रमशः घट्दै जाने पूर्वानुमान रहेको उनले बताए । मौसमविद् ढकालले धान काट्ने समय चलिरहेकाले मौसमको पूर्वानुमानमा ध्यान दिन किसानलाई सुझाव दिएका छन् । आइतबार दिउँसोतिर हुने वर्षाले काटेर राखिएको धानमा असर पार्न सक्ने भए पनि खेतमै रहेको नकाटिएको धानबालीमा भने असर नपार्ने उनले बताए । कृषि तथा अन्य व्यावसायिक गतिविधिको कार्यतालिका बनाउनुअघि आगामी दिनको मौसमबारे जानकारी लिनु उपयुक्त हुने उनको सुझाव छ ।