Thursday, November 19, 2026||
MultiKhabarMultiKhabar

फागुनमा स्थानीय तहको निर्वाचन हुँदैन, जनप्रतिनिधिको पाँचवर्षे कार्यकाल कटौती गर्न पाइँदैन’

Share:WhatsAppFacebookX (Twitter)Telegram
फागुनमा स्थानीय तहको निर्वाचन हुँदैन, जनप्रतिनिधिको पाँचवर्षे कार्यकाल कटौती गर्न पाइँदैन’
Photo / Coverage: जनताटाइम्स

‘दलहरूलाई अस्वीकार गरेर, निषेध गरेर अब चुनाव गर्छु भनेर नसोचे हुन्छ,’ उहाँले भन्नुभयो, ‘अब समय फेरिएको छ । काठमाडौं, मंसिर ३ । नेकपा (एमाले) का अध्यक्ष केपी शर्मा ओलीले स्थानीय तहका जनप्रतिनिधिको पाँचवर्षे कार्यकाल पूरा नहुँदै तीन महिना अगाडि निर्वाचन गराउने प्रस्तावप्रति आपत्ति जनाउनुभएको छ । उहाँले जनप्रतिनिधिको संवैधानिक कार्यकाल कटौती गरेर निर्वाचन गराउने कुरा स्वीकार्य नहुने स्पष्ट पार्दै निर्धारित समयभन्दा तीन महिना अगाडि स्थानीय तहको निर्वाचन हुन नसक्ने अडान व्यक्त गर्नुभएको छ । पार्टीको राष्ट्रिय भेलालाई बिहीबार सम्बोधन गर्दै अध्यक्ष ओलीले आगामी वैशाख ३१ गते स्थानीय तहका जनप्रतिनिधिहरूको कार्यकाल पूरा हुने उल्लेख गर्नुभयो । निर्वाचित जनप्रतिनिधिले पाँच वर्ष काम गर्न पाउने संवैधानिक व्यवस्था रहेको भन्दै उहाँले तीन महिना अगाडि नै निर्वाचन गराउने विषयमाथि प्रश्न उठाउनुभयो । ‘यो फागुनमा स्थानीय तहको निर्वाचन हुन्छ भन्ने कुरा होइन । वैशाखको ३१ गते स्थानीय तहका जनप्रतिनिधिहरूको समय पूरा हुन्छ,’ उहाँले भन्नुभयो, ‘छानिएका प्रतिनिधिहरूको कार्यकाल पाँच वर्ष हुन्छ, पाँच वर्षमा तीन महिना कमी हुने हो र ? असंवैधानिक कुरा गर्न पाइन्छ ?’ निर्वाचनको मिति अगाडि सार्नुपर्ने भए त्यसका लागि उचित संवैधानिक तथा व्यावहारिक आधार आवश्यक पर्ने उहाँको तर्क थियो । एक हप्ताअघि निर्वाचन गराउनु र दुई–तीन महिना अगाडि सार्नु फरक विषय भएको उल्लेख गर्दै उहाँले तीन महिना अगाडि निर्वाचन गराउने प्रस्तावप्रति असहमति जनाउनुभयो । ‘तीन महिना अगाडि चुनाव हुँदैन, हाम्रो अडान यही हो,’ अध्यक्ष ओलीले स्पष्ट पार्नुभयो । उहाँले निर्वाचनको नाममा राजनीतिक दलहरूलाई निषेध गर्ने वा प्रतिस्पर्धाबाट बाहिर राख्ने प्रयास नगर्न पनि चेतावनी दिनुभयो । राजनीतिक दलहरूलाई अस्वीकार गरेर निर्वाचन गराउने सोच लोकतान्त्रिक मान्यताअनुकूल नहुने उहाँको भनाइ थियो ।‘दलहरूलाई अस्वीकार गरेर, निषेध गरेर अब चुनाव गर्छु भनेर नसोचे हुन्छ,’ उहाँले भन्नुभयो, ‘अब समय फेरिएको छ ।’ अध्यक्ष ओलीले एमालेले आगामी स्थानीय तहको निर्वाचनमा उम्मेदवार छनोट प्रक्रियालाई निष्पक्ष, पारदर्शी र संस्थागत बनाउने बताउनुभयाे । पार्टीभित्र व्यक्तिगत प्रभाव, पहुँच र मनोमानीका आधारमा उम्मेदवार छनोट गर्ने प्रवृत्तिको अन्त्य हुने उहाँकाे भनाइ छ । उम्मेदवार छनोट गर्दा सम्बन्धित स्थानीय तहका पार्टी कमिटीको सिफारिसलाई विशेष महत्व दिइने उल्लेख गर्दै उहाँले स्थानीय आवश्यकता, जनमत र संगठनको मूल्यांकनका आधारमा निर्णय हुने बताउनुभयाे । ‘उम्मेदवार उठाउँदा जसको हात उसको जगन्नाथ नहोस्,’ उहाँले भन्नुभयो । स्थानीय तहबाट आएका सिफारिसलाई ध्यान दिएर पार्टीले उम्मेदवारको अन्तिम निर्णय गर्ने स्पष्ट पार्दै अध्यक्ष ओलीले विशेष परिस्थितिमा भने अपवाद हुन सक्ने बताउनुभयो । तर सामान्यतः उम्मेदवार छनोटमा निष्पक्षता र संस्थागत निर्णय प्रक्रिया अपनाउनुपर्ने उहाँको निर्देशन थियो । ‘स्थानीय तहको सिफारिसलाई ध्यान दिएर पार्टीले उम्मेदवारको निर्णय गर्छ । अपवादका रूपमा कहिलेकाहीँ त्यस्तो नहुन पनि सक्छ,’ उहाँले भन्नुभयो, ‘एकदम फेयरली पार्टी जानुपर्छ ।’

Share:WhatsAppFacebookX (Twitter)Telegram

Read Complete Original Article

Published originally on जनताटाइम्स

Visit Publisher Site →

Related News

🇳🇵 Nepal
कांग्रेस सहमहामन्त्री खतिवडाको प्रस्ताव- ‘स्थानीय र प्रदेश निर्वाचन सँगै गरौँ’
PoliticsJust now

कांग्रेस सहमहामन्त्री खतिवडाको प्रस्ताव- ‘स्थानीय र प्रदेश निर्वाचन सँगै गरौँ’

काठमाडौं । नेपाली कांग्रेसका सहमहामन्त्री रामहरि खतिवडाले स्थानीय तह र प्रदेशको निर्वाचन एकैपटक गर्नुपर्नेमा जोड दिएका छन् । निर्वाचन आयोगले स्थानीय तह निर्वाचनका लागि गृहकार्य गरिरहेका बेला सहमहामन्त्री खतिवडाले सो प्रस्ताव गरेका हुन् । उनले अन्य राजनीतिक दललाई समेत प्रदेश र स्थानीय तह निर्वाचन सँगै गर्न अपिल गरे । ‘सबै राजनीतिक पार्टीलाई अपिल गर्न चाहन्छु। […] ...

लोकपथ
हसिनाको पुनरागमन घोषणाले बङ्गलादेशमा हलचल, सात जिल्लामा सुरक्षा कडा
PoliticsJust now

हसिनाको पुनरागमन घोषणाले बङ्गलादेशमा हलचल, सात जिल्लामा सुरक्षा कडा

पूर्वप्रधानमन्त्री शेख हसिनाका समर्थकले राष्ट्रव्यापी प्रदर्शनको आह्वान गरेपछि बङ्गलादेश सरकारले राजधानी ढाकासहित सात जिल्लामा सयौँ सुरक्षाकर्मी परिचालन गरेको छ । विद्यार्थी नेतृत्वको विद्रोहबाट १५ वर्षे शासन अन्त्य भएपछि सन् २०२४ अगस्टमा भारत पलायन भएकी ७९ वर्षीया हसिनाले आगामी डिसेम्बरमा स्वदेश फर्कने घोषणा गरेकी छन् । प्रदर्शनकारीमाथि भएको घातक दमनसम्बन्धी मानवताविरुद्धको अपराधमा दोषी ठहर गर्दै अदालतले उनलाई अनुपस्थितिमै मृत्युदण्डको सजाय सुनाएको थियो ...

फरकधार
एपेक सम्मेलनमा ट्रम्प-सी भेटवार्ता, विश्व व्यापारदेखि आणविक हतियार नियन्त्रणसम्म छलफल
PoliticsJust now

एपेक सम्मेलनमा ट्रम्प-सी भेटवार्ता, विश्व व्यापारदेखि आणविक हतियार नियन्त्रणसम्म छलफल

अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच बिहीबार चीनको सेन्जेनमा आयोजित ३३ औँ एसिया–प्रशान्त आर्थिक सहयोग (एपेक) शिखर सम्मेलनका अवसरमा द्विपक्षीय वार्ता भएको छ । विश्व व्यापार, आणविक हतियार नियन्त्रण र अन्तर्राष्ट्रिय सुरक्षा चुनौतीबीच भएको यस भेटलाई दुई शक्तिराष्ट्रबीचको सम्बन्ध सुधारका दृष्टिले महत्त्वपूर्ण रूपमा हेरिएको छ । यसअघि ट्रम्पले रुसी राष्ट्रपति भ्लादिमिर पुटिनसँग पनि द्विपक्षीय भेट गरका थिए । ...

फरकधार
Multikhabar App

All Information In One Place

Real-time headlines from trusted sources. Get the app now — stay updated, inspired, and ahead with breaking news!

Get it on Google Play