<img src="https://www.lumbinisanchar.com/wp-content/uploads/2026/11/1794820374-vbQg6-400x220.jpg" alt=""/> <p>काठमाडौं। नेकपा (एमाले) का महासचिव शंकर पोखरेलले प्रधानमन्त्री बालेन्द्र साहले भारत भ्रमणका क्रममा नेपाल–भारत सीमा समस्याबारे नेपालको स्पष्ट अडान राख्नुपर्ने बताएका छन्।</p> <p>प्रधानमन्त्रीले नेपालको सार्वभौमिकता र सीमा अधिकारसँग जोडिएका विषयमा दिएको अभिव्यक्ति आपत्तिजनक रहेको भन्दै पोखरेलले त्यसलाई व्यवहारबाट सच्याउनुपर्ने बताएका हुन्।</p> <p>सोमवार पार्टी केन्द्रीय कार्यालय च्यासलमा आयोजित पत्रकार सम्मेलनमा बोल्दै पोखरेलले प्रधानमन्त्रीको सीमा विवादसम्बन्धी अभिव्यक्तिप्रति संसद् र राजनीतिक दलहरूले समेत आपत्ति जनाइसकेको बताए।</p> <p>प्रधानमन्त्रीले संसद्मा सीमा विवाद समाधानका लागि तेस्रो पक्षलाई सहभागी गराउने आशयको अभिव्यक्ति दिएको र त्यसको एउटा पक्ष सच्याए पनि नेपालको सार्वभौमिकता तथा सीमा अधिकारसँग जोडिएको विवादास्पद अभिव्यक्ति भने नसच्याएको पोखरेलको आरोप छ।</p> <p>नेपाल र भारतबीचको सीमा समस्याबारे दुवै पक्षका दस्तावेजमा अभिलेख रहेको उल्लेख गर्दै उनले सीमा विवाद नेपालको आफ्नै सरोकारको विषय भएको बताए। यस्तो संवेदनशील विषयमा प्रधानमन्त्रीले नेपालको पक्षमा दृढतापूर्वक पैरवी गर्नुपर्नेमा उल्टै नेपालको दाबी कमजोर पार्ने अभिव्यक्ति दिएको उनको भनाइ छ।</p> <p>पोखरेलले प्रधानमन्त्रीको आगामी भारत भ्रमणमा नेपाल–भारतबीच रहेका समस्याहरू, विशेषगरी सीमा विवाद समाधानको विषयलाई प्राथमिकताका साथ उठाउनुपर्ने बताए।</p> <p>प्रधानमन्त्रीले विगतमा आफ्नो कार्यालयमा ‘ग्रेटर नेपाल’को नक्सा राखेर सन्देश दिन खोजेको प्रसंग उल्लेख गर्दै पोखरेलले अहिलेको मुख्य दायित्व नेपालको वर्तमान सीमाङ्कनलाई सुरक्षित गर्नु रहेको बताए। ‘ग्रेटर नेपाल’को विषय इतिहाससँग जोडिएको भए पनि पछिल्लो समयको सीमाङ्कनको संरक्षण गर्नु सरकारको जिम्मेवारी भएको उनको भनाइ छ।</p> <p>यसैगरी पोखरेलले प्रधानमन्त्रीको राजनीतिक कार्यशैलीप्रति पनि आलोचना गरे। आफ्नै पार्टीसँग संवाद गर्न छाडेका प्रधानमन्त्रीबाट प्रतिपक्षी दलहरूसँग संवादको अपेक्षा गर्न नसकिने उनको टिप्पणी छ।</p> <p>उनले प्रधानमन्त्रीको कार्यशैली लोकतान्त्रिक नभएको आरोप लगाउँदै त्यसलाई अलोकतान्त्रिक, स्वेच्छाचारी र अधिनायकवादीको संज्ञा दिए। लोकतान्त्रिक शासन व्यवस्थामा राजनीतिक दलहरूसँग संवाद र सहकार्य आवश्यक हुने उल्लेख गर्दै पोखरेलले प्रधानमन्त्रीलाई आफ्नो कार्यशैली सच्याउन आग्रह गरे।</p> <p>पोखरेलले भने, “प्रधानमन्त्रीको सीमा विवादसम्बन्धी अभिव्यक्तिप्रति संसद् र राजनीतिक दलहरूले आपत्ति जनाइसकेका छन्। उहाँले तेस्रो पक्षको उपस्थितिसम्बन्धी अभिव्यक्ति सच्याए पनि नेपालको सार्वभौमिकता र सीमा अधिकारसँग जोडिएको विवादास्पद अभिव्यक्ति सच्याउनुभएको छैन। नेपाल–भारतबीचको सीमा समस्या दुवै देशका दस्तावेजमा अभिलेखित विषय भएकाले यसको समाधानमा सरकारले नेपालको पक्षमा दृढतापूर्वक पैरवी गर्नुपर्छ। प्रधानमन्त्रीले आगामी भारत भ्रमणका क्रममा सीमा समस्यालाई प्राथमिकताका साथ उठाउनुहुनेछ भन्ने अपेक्षा छ।”</p> <p>उनले प्रधानमन्त्रीको राजनीतिक कार्यशैलीप्रति टिप्पणी गर्दै भने, “प्रधानमन्त्रीको राजनीतिक कार्यशैली लोकतान्त्रिक र संवादमुखी देखिएको छैन। आफ्नै पार्टीसँग संवाद नगर्ने प्रधानमन्त्रीबाट प्रतिपक्षसँग संवादको अपेक्षा गर्न कठिन छ। उहाँको स्वेच्छाचारी र अधिनायकवादी कार्यशैली सच्याउनुपर्छ भन्ने हाम्रो आग्रह हो।”</p> <p>– न्युज एजेन्सी नेपाल</p>
प्रधानमन्त्रीले भारत भ्रमणका क्रममा सीमा समस्या उठाउनुपर्छ : महासचिव पोखरेल

Read Complete Original Article
Published originally on लुम्बिनी सञ्चार





