नेपाल लाइफको रेटिङ ‘डबल ए’ मा स्तरोन्नति, वित्तीय दायित्व पूरा गर्ने क्षमता अझ बलियो

नेपाल लाइफ इन्स्योरेन्स कम्पनी लिमिटेडको इक्रा नेपालले प्रदान गरेको इश्युअर रेटिङ ‘डबल ए माइनस’ बाट स्तरोन्नति भई ‘डबल ए’ कायम भएको छ । इक्रा नेपालले कम्पनीको वित्तीय अवस्था, सोल्भेन्सी प्रोफाइल, लगानी संरचना तथा प्रतिफल, बजार उपस्थिति, सञ्चालन क्षमता र व्यवस्थापकीय सबलताको मूल्याङ्कन गर्दै रेटिङ बढाएको हो । इक्राका अनुसार ‘डबल ए’ रेटिङ प्राप्त संस्थामा वित्तीय दायित्व समयमै पूरा गर्ने उच्च क्षमता र क्रेडिट जोखिम अत्यन्त न्यून हुन्छ । यसअघि जीवन बीमा क्षेत्रमा इक्रा नेपालबाट ‘डबल ए माइनस’ रेटिङ प्राप्त गर्ने पहिलो कम्पनी बनेको नेपाल लाइफले अहिले थप एक तह माथिको रेटिङ प्राप्त गरेको हो । कम्पनीले यसलाई वित्तीय सुदृढीकरण र संस्थागत उत्कृष्टताको उपलब्धिका रूपमा लिएको छ । इक्रा नेपालको पछिल्लो मूल्याङ्कनअनुसार कम्पनीको सोल्भेन्सी अनुपात अघिल्लो अवधिको करिब १४५ प्रतिशतबाट बढेर १५४ प्रतिशत पुगेको छ । यो नियामक निकायले तोकेको न्यूनतम १३० प्रतिशतभन्दा बढी हो। कम्पनीले सरकारी सुरक्षणमा लगानी विस्तार गर्नुका साथै मुद्दती निक्षेपमा रहेको लगानीको एकाग्रता घटाएर लगानी पोर्टफोलियो विविधीकरण गरेको मूल्याङ्कनमा उल्लेख छ । आर्थिक वर्ष २०२५/२६ मा कुल बीमाशुल्क आर्जनका आधारमा कम्पनीको बजार हिस्सा करिब २७ प्रतिशत रहेको छ। उक्त अवधिमा कम्पनीले करिब ५४ अर्ब रुपैयाँ बीमाशुल्क आर्जन गरेको छ । कम्पनीको जीवन बीमा कोष करिब २७३ अर्ब र पोलिसी लोनसहित कुल लगानी करिब २८५ अर्ब रुपैयाँ पुगेको छ । सन् २००१ देखि सञ्चालनमा रहेको नेपाल लाइफले सन् २०२६ को जुलाई मध्यसम्म देशभर १९६ शाखा, उपशाखा तथा क्षेत्रीय कार्यालयमार्फत सेवा दिँदै आएको छ । देशव्यापी शाखा सञ्जाल, अभिकर्ता संरचना, अनुभवी सञ्चालक समिति तथा व्यवस्थापन टोली र बजार उपस्थितिलाई इक्रा नेपालले कम्पनीका प्रमुख सबल पक्षका रूपमा उल्लेख गरेको छ । कम्पनीले जोखिम व्यवस्थापनका लागि नेपाल पुनर्बीमा कम्पनी र हिमालयन रिइन्स्योरेन्ससँग पुनर्बीमा व्यवस्था कायम गरेको छ। त्यस्तै, आकस्मिक तथा विपद्जन्य जोखिम व्यवस्थापनका लागि पर्याप्त क्याटास्ट्रोफिक कभर र करिब एक अर्ब ५४ करोड रुपैयाँको विपद् जगेडा कोष रहेको कम्पनीले जनाएको छ । रेटिङ स्तरोन्नतिबारे कम्पनीका प्रमुख कार्यकारी अधिकृत प्रवीण रमण पराजुलीले यसलाई निरन्तर सुधार, संस्थागत सुशासन, वित्तीय अनुशासन र सरोकारवालाको विश्वासको प्रतिफलका रूपमा व्याख्या गरेका छन् । उनले ‘डबल ए माइनस’बाट ‘डबल ए’मा भएको स्तरोन्नति कम्पनीको वित्तीय सुदृढता, निरन्तर उत्कृष्टता र दीर्घकालीन प्रतिबद्धताको उपलब्धि भएको बताए। यसले कम्पनीलाई अझ जिम्मेवार, सुदृढ र दिगो संस्थाका रूपमा अघि बढ्न प्रेरणा दिएको उनको भनाइ छ । पराजुलीले सञ्चालक समिति, बीमित, अभिकर्ता, कर्मचारी, शेयरधनी, नियामक निकाय तथा अन्य सरोकारवालाप्रति आभार व्यक्त गर्दै आगामी दिनमा सोल्भेन्सी अवस्था थप सुदृढ बनाउने, लगानी विविधीकरण र विवेकपूर्ण जोखिम व्यवस्थापनलाई प्राथमिकता दिने प्रतिबद्धता जनाएका छन् ।