नेपालगञ्ज म्याराथनमा रोटरी क्लबको सहकार्य

नेपालगञ्ज । रोटरी क्लब अफ सेन्ट्रल बाँकेले धारा नेपालगञ्ज म्याराथनसँग कम्युनिटी पार्टनरका रूपमा सहकार्य गर्ने भएको छ । विश्वव्यापी सामाजिक सेवा, मानवीय सहयोग र सामुदायिक विकासमा समर्पित अन्तर्राष्ट्रिय संस्था रोटरी क्लबअन्तर्गत रोटरी क्लब अफ सेन्ट्रल बाँकेले सहकार्य गर्ने भएको हो । यसमा विशेषगरी ह्विलचेयर तीन किमी दौडमा रोटरीको सहयोग रहनेछ । विश्व म्याराथनको एकमात्र प्रतिष्ठित पुरस्कार एम्स सोसल अवार्ड २०२६ बाट सम्मानित नेपालगञ्ज म्याराथनका संस्थापक अध्यक्ष टिएस ठकुरी र रोटरी क्लब अफ सेन्ट्रल बाँकेका अध्यक्ष ईश्वरीजंग मल्लबीच सम्झौतामा हस्ताक्षर भएको हो । यो सम्झौता पाँच वर्षका लागि गरिएको बताइएको छ । ह्विलचेयर तीन किमी रेसमा विशेष सहयोग गर्नुका साथै आफ्ना सम्पूर्ण सदस्यहरूलाई कुनै न कुनै विधामा औपचारिक ढंगले दौडाउने रोटरीको तयारी रहेको छ । ‘रोटरीसँग जोडिएका सबैलाई कुनै न कुनै रूपमा जोड्छौं’, बाँकेका अध्यक्ष मल्लले भन्नुभयो, ‘समुदायलाई दौडसंस्कृतिसँग जोड्दै सामाजिक एकताको अभियानमा हाम्रो सदैव साथ रहनेछ, गभर्नर नै यस अभियानमा निकै सकारात्मक हुनुहुन्छ ।’ रोटरीमा विभिन्न पेशाका उद्यमी, डाक्टर, इञ्जिनियर, सिए, बैंकर, शिक्षक, पत्रकार आबद्ध छन् । धारा नेपालगञ्ज म्याराथनको १२औँ संस्करण यही मंसिर १२ गते शनिबार नेपालगञ्जमा हुने भएको छ । यस वर्ष १२ वटा सामुदायिक संस्थासँग कम्युनिटी पार्टनरका रूपमा काम गर्ने तयारी भएको दर्ता विभाग प्रमुख गगन थापाले जानकारी दिनुभयो । स्थानीय बिपी चोकबाट सुरु हुने म्याराथनअन्तर्गत ४२ किलोमिटर पुरुष खुला, २१ किलोमिटर महिला खुला, १० किलोमिटर पुरुष खुला, १० किलोमिटर महिला खुला, पाँच किमी पुरुष खुला, पाँच किमी महिला खुला, पाँच किमी स्कुलस्तरीय छात्र-छात्रा दौड, तीन किमी कर्पोरेट रन, तीन किमी किड्स रन, तीन किमी ह्विलचेयर रन, दुई किमी फेमिली रन र तीन किमी रन फर अल गरेर १२ विधा समावेश गरिएको छ । म्याराथन(४२ किमी)पुरुष खुला भए पनि महिलाले आफ्नो व्यक्तिगत समयका लागि दौड्न चाहेमा विद्युतीय चिप्स उपलब्ध गराइनेछ । त्यसैगरी महिला हाफ म्याराथन(२१ किमी) महिलाका लागि भए तापनि पुरुष धावकले समय सुधारका लागि दौडन चाहेमा विद्युतीय चिप्स प्रदान गरिने व्यवस्था मिलाइएको रेस डाइरेक्टर चन्द्रबहादुर गुरुङले जानकारी दिनुभयो । ४२ किमीतर्फ विभिन्न उमेर समूहमा वरीयताक्रम निकालिने समेत उहाँले जानकारी दिनुभयो । यसमा ४० देखि ५० वर्ष, ५० देखि ६० वर्ष उमेर समूह, ६० देखि ७० वर्ष उमेर समूहलाई पहिलो, दोस्रो र तेस्रो वरीयता प्रदान गरेर प्रोत्साहन गरिनेछ । एबोट वर्ल्ड म्याराथन मेजरसँगको सहकार्यमा उमेर समूहको धावकलाई विश्वव्यापी वरीयतामा समेत समावेश गरिँदै आएको छ र यसपटक पनि गरिनेछ । साथै उमेर समूहको वर्ल्ड च्याम्पियनसिपमा सहभागितामा सहजीकरण गरिनेछ । त्यसैगरी विभिन्न विधाका शीर्ष धावकहरूलाई मेजर म्याराथनलगायत वर्ल्ड एथ्लेटिक्सको प्लेटिनम, गोल्ड, इलाइट र लेबल रेसहरूमा सहभागिताको अवसर प्रदान गरिने आयोजकले जनाएको छ । नेपालगञ्ज म्याराथन २०१५ देखि अविच्छिन्नरूपमा सञ्चालन हुँदै आएको दौड हो ।