धरानमा हवाई फायर गरी २ सय ९ किलो गाँजासहित पाँच जना पक्राउ

इनरुवा । सुनसरीको धरान उपमहानगरपालिका–२० च्यानडाँडाबाट २०९ किलोभन्दा बढी गाँजासहित पाँच जना पक्राउ परेका छन् । सोमबार दुईवटा स्कार्पियो गाडीमा गाँजा लोड गरिरहेको अवस्थामा उनीहरू पक्राउ परेका हुन् । पक्राउ पर्नेमा सप्तरीको डाक्नेश्वरी नगरपालिका–१० का २४ वर्षीय रामसागरकुमार यादव, राजगढ गाउँपालिका–१ का ४५ वर्षीय राजेन्द्रप्रसाद मण्डल, छिन्नमस्ता गाउँपालिका–६ का ५९ वर्षीय राजकुमार साह, भारतको बिहारस्थित मधुबनी जिल्लाका ३८ वर्षीय सन्तोष ठाकुर र धरान उपमहानगरपालिका–११ का २१ वर्षीय अमृत विशुङ्खे रहेका छन् । गाँजा लोड भइरहेको विशेष सूचनाका आधारमा इलाका प्रहरी कार्यालय धरानबाट खटिएको टोलीले उनीहरूलाई नियन्त्रणमा लिएको सुनसरीका प्रहरी उपरीक्षक पुष्पराज मल्लले जानकारी दिए । प्रहरी टोलीलाई देखेपछि गाँजा बोकेर भाग्न खोज्दा दुई राउन्ड हवाई फायर गरी उनीहरूलाई नियन्त्रणमा लिइएको मल्लले बताए । पक्राउ परेकाहरूले प्रयोग गरेका बा १० च ५०३८ र को १ च ८१८२ नम्बरका स्कार्पियो गाडीबाट २०९ किलो ४२० ग्राम गाँजाजस्तो देखिने पदार्थ बरामद भएको प्रहरीले जनाएको छ । लागूऔषधको अवैध कारोबार, ओसारपसार तथा सेवन नियन्त्रणका लागि सुनसरी प्रहरीले सञ्चालन गरिरहेको अभियानमा सहयोग गर्न प्रहरीले सर्वसाधारणसँग आग्रह गरेको छ । युवा पुस्ताको भविष्य जोगाउन, समाजलाई सुरक्षित बनाउन र लागूऔषध कारोबारको सञ्जाल तोड्न प्रहरी र नागरिकबीच सहकार्य आवश्यक रहेको प्रहरी उपरीक्षक मल्लले बताए । लागूऔषध कारोबारमा संलग्न जोसुकै भए पनि निष्पक्ष अनुसन्धान गरी कानुनी दायरामा ल्याउनुपर्नेमा उनले जोड दिए । लागूऔषध नियन्त्रणका विषयमा कुनै सम्झौता नहुने बताउँदै मल्लले अपराधमा संलग्नलाई संरक्षण नगरी कानुनी कारबाही गरिने प्रतिबद्धता जनाए । उनले लागूऔषध कारोबारबारे प्रहरीलाई सूचना दिन र नियन्त्रण अभियानमा सहयोग गर्न पनि आग्रह गरे । उनका अनुसार लागूऔषध कारोबारमा ३० देखि ३५ वर्षमुनिका युवाको संलग्नता बढी देखिएकाले समाजलाई सुरक्षित राख्न सबैको भूमिका महत्त्वपूर्ण छ ।