काठमाडौं। पूर्वाधार विकासमन्त्री सुनिल लम्सालले काठमाडौं-तराई/मधेस द्रुतमार्ग सडक आयोजनाको काम निर्धारित समयभित्रै सम्पन्न गर्न निर्देशन दिएका छन्। मकवानपुरको भीमफेदी र बकैया गाउँपालिकामा निर्माणाधीन महादेवटार सुरुङको ब्रेक थ्रु समारोहलाई सम्बोधन गर्दै उनले सरकारले यो आयोजनाको काम तीन वर्षभन्दा बढी लम्बिएको हेर्न नचाहेको स्पष्ट पारेका छन्। मन्त्री लम्सालले निर्माणमा ढिलाइ गर्ने कम्पनीसँगको ठेक्का तत्काल रद्द गरिने चेतावनी दिएका छन्। व्यवसायीहरूलाई पटक-पटक अवसर र सुविधा दिँदा पनि अपेक्षित परिणाम नआएको भन्दै उनले काम नसकिने अवस्था देखिए तत्काल ठेक्का तोड्न निर्देशन दिएका हुन्। हाल काम गर्ने मुख्य सिजन सुरु भइसकेकाले आगामी जेठसम्म निर्धारित कार्यतालिकाअनुसार ठोस प्रगति हुनुपर्नेमा उनले जोड दिएका छन्। द्रुतमार्गलाई सडक निर्माणमा मात्र सीमित नराखी नेपाली प्राविधिक जनशक्ति उत्पादन र अनुभव अभिवृद्धिको अवसरका रूपमा लिनुपर्ने उनको भनाइ छ। आयोजनामा खटिएका नेपाली इन्जिनियर, परामर्शदाता र नेपाली सेनाका प्राविधिकहरू भविष्यका ठूला पूर्वाधार निर्माणका लागि देशको अमूल्य सम्पत्ति हुने भन्दै उनले यस्ता आयोजना थप बढाउने सरकारको तयारी रहेको बताए। यसका साथै, विपद् व्यवस्थापन र छोटो समयमै बेली ब्रिज निर्माणमा नेपाली सेनाले देखाएको कार्यक्षमताको मन्त्री लम्सालले प्रशंसा गरेका छन्। आगामी दिनमा सरकारले नेपाली सेनालाई अन्य धेरै आयोजनाहरूमा सहभागी गराउने योजना रहेको उनले जानकारी दिएका छन्।
द्रुतमार्गको काम समयमै सक्न मन्त्री लम्सालको निर्देशन

Read Complete Original Article
Published originally on नेपालन्युज






