दिदीबहिनी नभएकालाई अञ्जली दिदीको माया, २८ वर्षदेखि लगाउँदैछिन् सामूहिक टीका

काठमाडौं । दिदीबहिनी नभएका दाजुभाइको निधार खाली नहोस् भन्ने उद्देश्यले अञ्जली दिदी (मास्के) ले यस वर्ष पनि सामूहिक भाइटीका आयोजना गरेकी छन्। उनले २०५५ सालदेखि निरन्तर सामूहिक भाइटीका लगाउँदै आएकी छन्। बिहीबार काठमाडौंको वसन्तपुरस्थित काष्ठमण्डपमा उनले दिदीबहिनी नभएका दाजुभाइलाई सप्तरङ्गी टीका र मखमलीको माला लगाइदिएकी हुन्। यसरी सामूहिक भाइटीका लगाउने परम्परालाई उनले यस वर्ष २८औँ वर्षसम्म निरन्तरता दिएकी छन्। अञ्जली दिदीका अनुसार भाइटीका केवल परम्परा निर्वाह गर्ने पर्व मात्र नभई श्रद्धा, माया र भावनासमेत साटासाट गर्ने उत्सव हो। दिदीबहिनी नभएका कारण कसैको पनि निधार खाली नरहोस् भन्ने भावनाले हरेक वर्ष सामूहिक भाइटीका आयोजना गर्दै आएको उनले बताइन्। दाजुभाइ र दिदीबहिनीबीच निःस्वार्थ माया र आत्मीयता बढिरहोस् भन्ने कामनासहित आगामी वर्षहरूमा पनि सामूहिक भाइटीकालाई निरन्तरता दिने उनको भनाइ छ।