तीन महिनामा करिब १० करोडका मूर्ति तथा प्रतिमा निर्यात

काठमाडौं । नेपालले तीन महिनामा करिब १० करोड रुपैयाँ बराबरका विभिन्न प्रकारका मूर्ति तथा प्रतिमा निर्यात गरेको छ । भन्सार विभागको तथ्यांकअनुसार चालु आर्थिक वर्ष २०८३/०८४ को साउनदेखि असोजसम्ममा नेपालबाट ९ करोड ९५ लाख रुपैयाँ बराबरका मूर्ति तथा प्रतिमा विदेश निर्यात भएका हुन् । भन्सार विभागका अनुसार उक्त अवधिमा बहुमूल्य धातुको जलप लगाइएका साना मूर्ति तथा प्रतिमाहरू ५ करोड १४ लाख ४१ हजार रुपैयाँ बराबरको निर्यात भएका छन् । त्यसैगरी, बहुमूल्य धातुको जलप लगाइएका अन्य सजावटी सामग्री १ करोड ६५ लाख ७ हजार रुपैयाँ र अन्य साना मूर्ति तथा प्रतिमाहरू ४ करोड २८ लाख ३० हजार रुपैयाँ बराबरका निर्यात भएका छन् । १६ देशमा बहुमूल्य धातुको जलप लगाइएका मूर्ति निर्यातबहुमूल्य धातु (जस्तै सुन तथा चाँदी) को जलप लगाइएका साना मूर्ति तथा प्रतिमाहरू विभिन्न १६ देशमा निर्यात भएको तथ्याङ्कले देखाएको छ । यस्ता सामग्री निर्यात भएका प्रमुख गन्तव्य मुलुकमा अर्जेन्टिना, अष्ट्रेलिया, चीन, जर्मनी, हङकङ, भारत, इटाली, जापान, नेदरल्यान्ड्स, सिंगापुर, स्पेन, स्विट्जरल्यान्ड, ताइवान, संयुक्त अधिराज्य, संयुक्त राज्य अमेरिका र भियतनाम रहेका छन् । जसबाट ५ करोड १४ लाख ४१ हजार रुपैयाँ नेपाल भित्रिएको छ । त्यसैगरी, बहुमूल्य धातुको जलप लगाइएका अन्य सजावटी सामग्रीहरू विभिन्न १० देशमा निर्यात भएका छन् । जसबाट झण्डै १७ लाख रुपैयाँको वैदेशिक व्यापार भएको छ । अष्ट्रेलिया, क्यानडा, चीन, भारत, जापान, दक्षिण अफ्रिका, स्विट्जरल्यान्ड, ताइवान, संयुक्त अधिराज्य र संयुक्त राज्य अमेरिका यस्ता सामग्रीका निर्यात गन्तव्य मुलुक हुन् । २३ देशमा साना मूर्ति तथा प्रतिमा निर्यातसाना मूर्ति तथा प्रतिमाहरू भने विभिन्न २३ देशमा निर्यात भएका छन् । यसका प्रमुख गन्तव्य मुलुकमा अर्जेन्टिना, अष्ट्रेलिया, अस्ट्रिया, क्यानडा, चीन, चेक गणतन्त्र, डेनमार्क, फिनल्यान्ड, फ्रान्स, जर्मनी, हङकङ, भारत, जापान, केन्या, दक्षिण कोरिया, न्युजिल्यान्ड, नर्वे, पोल्यान्ड, स्विट्जरल्यान्ड, ताइवान, संयुक्त अधिराज्य, संयुक्त राज्य अमेरिका र भियतनाम रहेका छन् । ४ करोड २८ लाख बढी रुपैयाँ नेपाल भित्रिएको छ ।यस तथ्यांकले नेपाली मूर्ति तथा प्रतिमाहरूको अन्तर्राष्ट्रिय बजारमा निर्यात विस्तार भएको देखाउँछ । विशेषगरी बहुमूल्य धातुको जलप लगाइएका मूर्ति तथा सजावटी सामग्रीदेखि अन्य प्रकारका मूर्तिहरूसम्म विभिन्न मुलुकमा निर्यात भइरहेको देखिन्छ ।