काठमाडौं । जापानमा मस्तिष्कघात (स्ट्रोक) भएपछि विगत ६ महिनादेखि उपचाररत नेपाली चेली विष्णु कुँवर स्वदेश फर्किएकी छन्। आर्थिक अभावका कारण जापानमा उपचारलाई निरन्तरता दिन कठिनाइ भएपछि नेपाली कांग्रेसका नेता तथा गिरिजाप्रसाद कोइराला फाउन्डेसनका सभापति डा. सुनीलकुमार शर्माको पहलमा उनलाई नेपाल ल्याएर निःशुल्क उपचारको व्यवस्था मिलाइएको हो। जापानबाट सोमबार दिउँसो नेपाल फर्किएकी कुँवरलाई थप उपचारका लागि काठमाडौं मेडिकल कलेज (केएमसी), सिनामंगलमा भर्ना गरिएको छ। उनलाई स्वागत गर्न डा. शर्मासहित काठमाडौं मेडिकल कलेज शिक्षण अस्पतालका चिकित्सकहरूको टोली त्रिभुवन अन्तर्राष्ट्रिय विमानस्थल पुगेको थियो। अस्पतालले कुँवरको स्वास्थ्य अवस्थाबारे विस्तृत परीक्षण गरी आवश्यक उपचार प्रक्रिया अघि बढाउने जनाएको छ । डा. शर्माले उनको उपचारमा लाग्ने सम्पूर्ण खर्च बेहोर्ने जिम्मेवारी लिएका छन्। चिकित्सा विज्ञानले सम्भव भएसम्मका सबै उपचार केएमसीमा निःशुल्क उपलब्ध गराउने प्रतिबद्धतासमेत उनले जनाएका छन्। रोजगारी र सुन्दर भविष्यको खोजीमा जापान पुगेकी कुँवरलाई अचानक मस्तिष्कघात भएपछि स्वास्थ्य अवस्था जटिल बनेको थियो। जापानकै अस्पतालमा उपचाररत रहे पनि आर्थिक समस्याका कारण उनी स्वदेश फर्किएर परिवारसँगै उपचार गराउने चाहना पूरा गर्न सकेकी थिइनन्। यसैक्रममा जापान भ्रमणमा रहेका डा. शर्मालाई त्यहाँ कार्यरत नेपाली पत्रकार लक्ष्मण पाठकले कुँवरको अवस्थाबारे जानकारी गराएका थिए। आर्थिक अभावका कारण उपचारमा भइरहेको कठिनाइबारे जानकारी पाएपछि डा. शर्माले उनलाई नेपाल फर्काएर उपचारको सम्पूर्ण जिम्मेवारी लिने प्रतिबद्धता जनाएका थिए। सोही प्रतिबद्धताअनुसार कुँवरलाई स्वदेश फर्काएर निःशुल्क उपचारको व्यवस्था मिलाइएको हो। डा. शर्मा स्वास्थ्य र शिक्षा क्षेत्रलाई व्यावसायिक गतिविधिका रूपमा मात्र नभई नागरिकप्रतिको सामाजिक उत्तरदायित्व र मानवीय सेवाका माध्यमका रूपमा अघि बढाउँदै आएका छन्। काठमाडौं मेडिकल कलेज र नोबेल मेडिकल कलेजमार्फत उनले आर्थिक अवस्था कमजोर भएका, उपचार खर्च जुटाउन नसक्ने तथा स्वास्थ्य सेवाको पहुँचबाट टाढा रहेका नागरिकलाई निःशुल्क स्वास्थ्य सेवा उपलब्ध गराउँदै आएका छन्। आर्थिक अभावका कारण कुनै पनि नागरिक जीवनरक्षक उपचारबाट वञ्चित हुन नपरोस् भन्ने उद्देश्यले कुँवरको उपचारको सम्पूर्ण जिम्मेवारी लिइएको डा. शर्माले बताएका छन्।
जापानमा मस्तिष्कघात भएकी विष्णु कुँवरलाई स्वदेश झिकाए डा. सुनील शर्माले, केएमसीमा निःशुल्क उपचार हुने

Read Complete Original Article
Published originally on केन्द्रबिन्दु





_IX1Hc0VGIZ.jpg)
