जनकपुरबाट अयोध्या पुग्न अब रेल सेवा, भारतले दियो साप्ताहिक रेल सञ्चालनको स्वीकृति

नेपालको जनकपुरधाम र भारतको उत्तर प्रदेशस्थित अयोध्याबीच साप्ताहिक रेल सेवा सञ्चालन हुने भएको छ । भारत सरकारले जनकपुरधामदेखि अयोध्या क्यान्टसम्म रेल सेवा सञ्चालन गर्ने प्रस्तावलाई स्वीकृति दिएको हो । प्रधानमन्त्री बालेन्द्र शाहको प्रस्तावित भारत भ्रमणका क्रममा उक्त रेल सेवाको उद्घाटन गर्ने तयारी गरिएको छ । प्रधानमन्त्रीको भारत भ्रमणका अवसरमा नेपाल–भारतबीचको धार्मिक तथा सांस्कृतिक सम्बन्धलाई थप मजबुत बनाउने उद्देश्यसहित रेल सेवा उद्घाटन गर्ने अपेक्षा गरिएको हो । भारतको प्रेस इन्फर्मेसन ब्युरो (पीआईबी) ले शनिबार सार्वजनिक गरेको जानकारीअनुसार करिब ६०४ किलोमिटर दूरीको यो रेल सेवाले रामायणसँग जोडिएका दुई महत्वपूर्ण धार्मिक स्थललाई जोड्नेछ । जनकपुरधामलाई माता सीताको जन्मभूमि र अयोध्यालाई भगवान् श्रीरामको जन्मभूमिका रूपमा लिइन्छ । रेल सेवा जनकपुरधामबाट प्रत्येक शनिबार र अयोध्या क्यान्टबाट प्रत्येक सोमबार सञ्चालन हुनेछ । रेलले भारतको बिहार र उत्तर प्रदेशका विभिन्न सहर हुँदै यात्रा गर्नेछ । यस क्रममा जयनगर, मधुबनी, शिशो, सीतामढी, रक्सौल, नरकटियागञ्ज, गोरखपुर, बस्ती, मनकापुर र अयोध्या धाममा व्यावसायिक रूपमा यात्रु चढाउने र ओराल्ने व्यवस्था हुनेछ । यो रेल सेवा सञ्चालनमा आएपछि नेपाल र भारतबीच धार्मिक पर्यटन तथा सीमापार आवागमन थप सहज हुने अपेक्षा गरिएको छ । विशेषगरी जनकपुर र अयोध्याबीच रामायण सर्किटमा आधारित धार्मिक यात्रालाई यसले प्रोत्साहन गर्नेछ । यसबाट तीर्थयात्री र पर्यटकसँगै शिक्षा, व्यापार तथा पारिवारिक कामका लागि आवतजावत गर्ने यात्रुलाई समेत सुविधा पुग्ने भारतीय पक्षको विश्वास छ । रेलमार्गले बिहार र नेपालका सीमावर्ती क्षेत्रका स्थानीय अर्थतन्त्रमा समेत सकारात्मक प्रभाव पार्ने अपेक्षा गरिएको छ । पर्यटन व्यवसाय, होटल तथा आतिथ्य सेवा, स्थानीय व्यापार र परम्परागत हस्तकलासँग सम्बन्धित व्यवसायले नयाँ अवसर पाउने भारतीय पक्षले जनाएको छ । भारत र नेपालबीचको ऐतिहासिक, सांस्कृतिक तथा सामाजिक सम्बन्धलाई थप मजबुत बनाउने उद्देश्यले रेल सेवा विस्तार गरिएको पीआईबीले उल्लेख गरेको छ । यसले दुई देशबीचको धार्मिक तथा सांस्कृतिक सम्बन्धलाई यातायात सञ्जालमार्फत थप नजिक ल्याउने विश्वास गरिएको छ ।