जनकपुरधाम-अयोध्या रेल सेवा दुवै देशका प्रधानमन्त्रीले उद्घाटन गर्ने

जनकपुरधाम । भारतको अयोध्यादेखि नेपालको जनकपुरधामसम्म वन्देभारत एक्सप्रेस रेल सेवा सञ्चालन हुने भएको छ । भारतीय रेल मन्त्रालयका अनुसार नेपाल र भारतबीचको धार्मिक तथा सांस्कृतिक सम्बन्धलाई थप बलियो बनाउने उद्देश्यले यो सेवा सुरु गर्न लागिएको हो । रेल सेवाको मंसिर ७ गते अर्थात् नोभेम्बर २३ मा उद्घाटन गर्ने कार्यक्रम तय भएको भारतीय रेल मन्त्रालयले जनाएको छ । नेपालका प्रधानमन्त्री बालेन्द्र शाह र भारतका प्रधानमन्त्री नरेन्द्र मोदीले भिडियो कन्फरेन्समार्फत संयुक्त रूपमा सेवाको उद्घाटन गर्ने कार्यक्रम रहेको छ । यो रेल सेवा सञ्चालनमा आएपछि भगवान् राम र माता सीतासँग सम्बन्धित धार्मिक तथा सांस्कृतिक स्थलहरूको भ्रमण गर्न चाहने तीर्थयात्रीलाई सहज हुने अपेक्षा गरिएको छ । यसले नेपाल र भारतबीचको ऐतिहासिक, धार्मिक तथा सामाजिक सम्बन्धलाई थप मजबुत बनाउनुका साथै पर्यटन, व्यापार र क्षेत्रीय आर्थिक गतिविधिमा समेत सहयोग पुग्ने विश्वास गरिएको छ । मण्डल रेल प्रबन्धक, लखनऊका अनुसार उद्घाटन कार्यक्रममा उत्तर प्रदेशका राज्यपाल आनन्दीबेन पटेल, मुख्यमन्त्री योगी आदित्यनाथ, केन्द्रीय रेलमन्त्री अश्विनी वैष्णव, उपमुख्यमन्त्री केशवप्रसाद मौर्य र ब्रजेश पाठकलगायतको उपस्थिति रहनेछ । करिब ६०४ किलोमिटर दूरी तय गर्ने यो साप्ताहिक रेल सेवाले जनकपुरधामलाई अयोध्या क्यान्टसँग जोड्नेछ । रेल बिहार र उत्तर प्रदेशका विभिन्न महत्वपूर्ण सहर तथा बस्ती हुँदै सञ्चालन हुनेछ । भारतीय रेल्वेका अनुसार यसका टर्मिनल स्टेसनबाहेक जयनगर, मधुबनी, शिशो, सीतामढी, रक्सौल, नरकटियागञ्ज, गोरखपुर, बस्ती, मनकापुर र अयोध्या धाममा समेत स्टप रहनेछन् । यो रेल सेवा हप्तामा एक पटक सञ्चालन हुनेछ । यसको सुरुवात शनिबार जनकपुरधामबाट र सोमबार अयोध्या क्यान्टबाट हुने जनाइएको छ । नयाँ सेवाबाट तीर्थयात्री, पर्यटक तथा अन्य यात्रुलाई सीमापार आवतजावत गर्न सहज हुने अपेक्षा गरिएको छ । यसले रामायणसँग सम्बन्धित धार्मिक पर्यटन सर्किटको प्रवर्द्धनमा समेत सहयोग पुग्ने विश्वास गरिएको छ । अध्ययन, व्यापार र पारिवारिक प्रयोजनका लागि यात्रा गर्ने यात्रुहरूलाई पनि यसले थप सुविधा दिनेछ । रेल सेवाको पहुँच विस्तारसँगै पर्यटन व्यवसायी, होटल तथा आतिथ्य क्षेत्र, स्थानीय व्यापारी र परम्परागत हस्तकलामा संलग्न कारीगरहरूका लागि नयाँ अवसर सिर्जना हुने अपेक्षा गरिएको छ । रेलमार्ग आसपासका स्थानीय अर्थतन्त्रले समेत यसबाट लाभ लिन सक्नेछन् ।