काठमाडौं। सत्तारूढ राष्ट्रिय स्वतन्त्र पार्टी (रास्वपा) का २० सांसद यतिबेला उत्तरी छिमेकी चीनको भ्रमणमा छन्। चिनियाँ कम्युनिस्ट पार्टीको निमन्त्रणामा रास्वपा महामन्त्री विपिन आचार्यको नेतृत्वमा सांसदहरूको टोली चीन भ्रमणमा गएको हो। यसैबीच, चीन भ्रमणमा रहेका रास्वपा सांसदहरूबीच नेपालको समसामयिक राजनीतिक अवस्थाबारे भएको कुराकानीको भिडियो सार्वजनिक भएको छ। भ्रमण टोलीका सदस्य सांसद श्रीराम न्यौपानेले सामाजिक सञ्जाल फेसबुकमा सार्वजनिक गरेको भिडियोमा सांसदहरूबीच नेपाली राजनीति र पारिवारिक विषयमा कुराकानी भइरहेको सुनिन्छ। न्यौपानेले फेसबुकमा रोबोटले खेलिरहेको दृश्यसहितको भिडियो पोस्ट गरेका थिए। उक्त भिडियोको पृष्ठभूमिमा सांसदहरूबीच नेपाली कांग्रेस, नेकपा एमाले र आगामी निर्वाचनलगायतका विषयमा छलफल भइरहेको सुनिन्छ। भिडियोमा एक पुरुष सांसदले नेपाली कांग्रेसको नेतृत्व पुनः शेरबहादुर देउवाकै हातमा जानुपर्ने धारणा राखेका छन्। उनले भनेका छन्, ‘शेरबहादुर देउवाको हातमा कांग्रेस जानुपर्छ अझै।’ त्यसको जवाफमा एक महिला सांसदले अदालतको फैसलासमेत देउवाकै पक्षमा आउनुपर्ने आशय व्यक्त गरेकी छन्। उनले भनेकी छन्, ‘अदालतले पनि फैसला गर्दा शेरबहादुरकोमा जानुपर्छ।’ ती पुरुष सांसदले पनि उनको भनाइमा सहमति जनाउँदै समर्थन गरेका छन्। कुराकानीकै क्रममा ती महिला सांसदले स्थानीय तहको निर्वाचनसम्म एमाले अध्यक्ष केपी शर्मा ओली र नेता महेश बस्नेत अझै चर्को रूपमा प्रस्तुत हुनुपर्ने धारणा राखेकी छन्। उनले भनेकी छन्, ‘स्थानीय चुनावसम्म र ओलीले रोक्नुहुन्न, योभन्दा डबल चर्को भएर निस्कनुपर्छ, ओली र महेश बस्नेत।’ उनको उक्त भनाइमा अर्की महिला र एक पुरुष सांसदले पनि समर्थन जनाएका छन्। उनीहरूले ओली र बस्नेत आफ्नो स्वभावअनुसार चर्को रूपमा प्रस्तुत हुने प्रतिक्रिया दिएका छन्। चीन भ्रमणका क्रममा खिचिएको उक्त भिडियो सार्वजनिक भएपछि रास्वपा सांसदहरूबीचको राजनीतिक संवाद चर्चामा आएको छ।
चीन भ्रमणमा रहेका रास्वपा सांसदबीच राजनीतिक चर्चा, देउवा र ओलीबारे पनि टिप्पणी

Read Complete Original Article
Published originally on नेपालन्युज






